Hvítt duft til sendiráðsins

Bandaríska sendiráðinu í Reykjavík barst í gær umslag sem innihélt hvítt duft. Slökkvilið mætti á staðinn og fjarlægði pakkninguna sem síðan var farið með á sýklarannsóknadeild Landspítala í Ármúla.

Fleiri bandarísk sendiráð víða í Evrópu hafa fengið viðlíka sendingu. Niðurstöður rannsókna á þeim sýnum sem þegar hafa fengist sýna að duftið er hættulaust.

Kathy Eagen, tengslafulltrúi í sendiráðinu, segir að þegar umslagið barst hafi strax  verið haft samband við lögreglu sem hafi mætt á staðinn. „Við höfum enn ekki fengið niðurstöðu um hvað þetta var,“ sagði Eagen í samtali við mbl.is og ekki væri ljóst hvenær niðurstaða fengist en vonandi á morgun. Hún benti á að önnur bandarísk sendiráð hefðu fengið slík umslög og duftið í þeim hefði reynst hættulaust.

Eagen segir að eftir því sem næst verði komist sé þetta í fyrsta sinn sem bandaríska sendiráðið í Reykjavík fær hvítt duft sent í umslagi.

Samkvæmt upplýsingum lögreglunnar á höfuðborgarsvæðinu eru viðhafðar ákveðnar varúðarráðstafanir í tilfellum sem þessum. Slökkvilið hafi séð um að fjarlægja sendinguna og fara með hana á sýklarannsóknadeild. Ekki er ljóst hvenær niðurstaðna rannsókna er að vænta, að sögn lögreglu.

• 3 blogg um fréttina

Bloggað um fréttina

• Þórarinn M Friðgeirsson: Gott í baksturinn - veitir ekki af.
• Bergur Thorberg: Bakað í sendiráðinu
• Haraldur Bjarnason: Hveiti eða sykur?