Reglur um endurfjármögnun sparisjóða

Gefnar hafa verið út reglur um endurfjármögnun og endurskipulagningu sparisjóðanna. Byggjast þær á heimild í neyðarlögunum svonefndu, sem sett voru í haust, en samkvæmt  þeim er fjármálaráðherra, við sérstakar aðstæður, heimilt að leggja sparisjóði til fjárhæð sem nemur allt að 20% af bókfærðu eigin fé hans gegn endurgjaldi í formi stofnfjárbréfa eða hlutabréfa.

Í tilkynningu frá fjármálaráðuneytinu segir, að stjórnvöld hafi kynnt sér fjárhagsstöðu sparisjóðanna í kjölfar þeirra fjárhagsáfalla sem dunið hafi yfir. Niðurstaða könnunarinnar leiði í ljós, að staða sjóðanna sé mismunandi en ljóst, að mjög erfiðir tímar fari í hönd hjá þeim og því líklegt að leitað verði eftir fjárframlögum úr ríkissjóði.

Segir ráðuneytið, að vegna fjárhagslegra hagsmuna ríkissjóðs og mikilvægis sparisjóðanna í íslenskri fjármálaþjónustu sé nauðsynlegt að sett verði skýr viðmið um fjárframlög ríkisins til þeirra. Jafnframt sé nauðsynlegt að gæta þess að sparisjóðirnir geri samhliða aðrar ráðstafanir til að styrkja eiginfjárstöðu sína, endurskoði rekstaráætlanir sínar með tilliti til breytts efnahagsumhverfis og sýni fram á raunhæfar leiðir til hagræðingar.

Til að samræmis verði gætt og sparisjóðirnir geti gert viðeigandi ráðstafanir telji stjórnvöld því nauðsynlegt að setja reglur um forsendur framlaga úr ríkissjóði.

Árni Mathiesen, fjármálaráðherra vék sæti við töku ákvarðana um endurfjármögnun og endurskipulagningu sparisjóðanna og var Guðlaugur Þór Þórðarson, heilbrigðisráðherra, settur til að fara með „téð mál og taka ákvarðanir í því”, með bréfi forsætisráðherra, dagsettu 8. desember 2008.

• 1 blogg um fréttina

Bloggað um fréttina

• Vilhjálmur Árnason: Afglöp ? Eða yfirlýst stefna viðskiptaráðherra.