Um 150 milljarða bakreikningur

Útlit er fyrir að um 150 milljarðar króna falli á íslenska skattgreiðendur vegna uppgjörs þrotabús Landsbankans. Kröfuhafar á bankann, aðrir en innstæðueigendur, geta ekki búist við að fá greitt. Þetta var opinberað nýlega á fundi skilanefndar bankans með 8-10 hópum kröfuhafa.

Takist ekki að selja eignir fyrir innlánum bankans munu íslenska ríkið, Holland og Bretland tapa fé vegna trygginga á innistæðum á Icesave-reikningunum í útibúum bankans. Munurinn gæti numið ríflega þrjú hundruð milljörðum króna og áðurnefndir 150 milljarðar lenda þá á íslenska ríkinu. Þetta staðfestir Lárus Finnbogason, formaður skilanefndar Landsbankans, en segir tölurnar þó óljósar. „Sérstaklega þegar litið er til eignanna. Við höfum sett upp áætlanir. Seldum við allt á brunasölu núna fengjust sennilega innan við 50% af því sem hugsanlega fengist biðum við í fimm ár.“

Hann vill ekki fara nákvæmlega yfir þær tölur sem nefndar voru á fundinum með kröfuhöfum. „Við báðum kröfuhafana að skrifa undir yfirlýsingu um að upplýsingarnar væru í trúnaði. Við verðum að halda þann trúnað.“

Vilja neyðarlögunum hnekkt

Lárus segir viðbúið að kröfuhafar fari í mál við ríkið til þess að hnekkja neyðarlögunum sem sett voru í október. Þau færðu þá aftar innlánseigendum; þ.e. innstæðutryggingasjóðum landanna þriggja, í forgangsröðinni að fjármununum í bönkunum. „Þeir hafa ekki hótað því ennþá, nei,“ segir hann. „Það mun örugglega verða síðar.“

Hann segir að kröfuhöfum hafi átt að vera ljóst í hvað stefndi. Í skýrslu Alþjóðagjaldeyrissjóðsins, IMF, frá því í nóvemberlok hafi staðið skýrum stöfum að ekki væru líkur á að eignir Landsbankans dygðu fyrir innstæðum. „Hafi þeir lesið skýrsluna, sem þeir hafa örugglega gert, átti þeim að vera þetta ljóst.“

Næsti fundur með kröfuhöfum verður seinni hluta janúarmánaðar.