,,Var draumastarfið mitt“

Kærunefnd jafnréttismála komst að þeirri niðurstöðu að Svæðisskrifstofa málefna fatlaðra á Vesturlandi hefði brotið gegn ákvæðum laga um jafna stöðu og jafnan rétt karla og kvenna, þegar karlmaður var ráðinn í starf forstöðumanns Fjöliðjunnar á Akranesi seint á síðasta ári.

Tíu umsækjendur sóttu um stöðu forstöðumanns, þrír karlmenn og sjö konur. Af þeim voru fjórir umsækjendur teknir í viðtöl og að þeim loknum var karlmaður ráðinn í stöðuna. Ein kvennanna, Inga Sigurðardóttir, þroskaþjálfi með viðbótarmenntun í uppeldisfræðum, kærði ráðninguna til kærunefndar jafnréttismála á þeim forsendum að hún væri hæfari en sá sem var ráðinn.

Í niðurstöðu kærunefndarinnar segir að menntun þess sem starfið hlaut sé umtalsvert minni en kæranda og ekki halli á kæranda varðandi starfsreynslu. Huglægt mat á persónulegum eiginleikum þess sem starfið hlaut geti ekki vikið til hliðar hlutlægum mælistikum á borð við sérhæfða menntun og starfsreynslu. Kærunefndin segir ennfremur að Svæðisskrifstofan geti ekki borið fyrir sig vilja til þess að jafna hlut kynjanna í störfum í málaflokknum, þar sem það eigi aðeins við þegar um jafnhæfa einstaklinga sé að ræða. Er því beint til Svæðisskrifstofunnar að leitað verði lausna í málinu sem kærandi geti sætt sig við.