Sólin styður Græna netið

Sól á Suðurlandi lýsir fullum stuðningi við afstöðu Græna Netsins
vegna áforma stjórnvalda um ríkisstyrk til stóriðju í Helguvík. Í yfirlýsingu Sólar á Suðurlandi segir að mikilvægt sé að allt atvinnulífið, almenningur og umhverfið njóti sanngirni og réttlætis við uppbyggingu efnahags og atvinnulífs á Íslandi.

Í yfirlýsingunni segir að loforð um ríkisstyrk til að keyra í gegn áform vegna umdeildrar stóriðju hafi áhrif langt út fyrir svæði sem njóta á vildarkjara ríkisstjórnarinnar á vafasömum forsendum. Mikilvægt sé að mismuna hvorki atvinnugreinum né misbjóða lýðræðinu þegar erfiðleikar steðja að. Boðuð störf séu fuglar í skógi.

Þá segir að allt sé óljóst og ófrágengið hvað varðar útblástursheimildir, orkuöflun, dreifingu vinnuafls og fjölda starfa. Upplýsingar þar um séu hvergi á borðinu.

Sól á Suðurlandi skorar á ríkisstjórnina að leggja öll spilin á  borðið og standa við fyrri stefnu sína, sem hét Fagra Ísland. 
 
„Össur Skarphéðinsson fær prik frá Sól á Suðurlandi, fyrir að staðfesta að virkjun neðri Þjórsár sé ekki undir vegna Helguvíkur og að það býr fólk við Þjórsá sem Landsvirkjun hefur ekki samið við. Sól á Suðurlandi telur að risaálver í Helguvík þurrki upp mestalla þá orku sem hægt verður að kreista fram á suðvesturhluta landsins. Sólin óttast að Þjórsá fari þá  í stækkun í Straumsvík, þrátt fyrir alla andstöðuna. Orkan fari öll í álið,“ segir í yfirlýsingu Sólar á Suðurlandi.

Þá segir að það hljóti að teljast vafasamt á tímum sem þessum að fórna svo miklu fyrir álverin meðan álverð lækkar og önnur tækifæri taka við. Áætlanir um álver sem helstu bjargráð heilla landshluta hafi ekki reynst
heilladrjúg.

• 1 blogg um fréttina

Bloggað um fréttina

• S i g u r ð u r S i g u r ð a r s o n: Tekur Sól þátt í blöffi iðnaðarráðherra?