Innlent | mbl | 8.1.2009 | 10:14

Vill byggja 120 milljarða Háskólasjúkrahús

„Ef hafist er handa um byggingu nýs Háskólasjúkrahúss, munar það umtalsverðu fyrir byggingariðnaðinn á höfuðborgarsvæðinu, húsið gæti orðið tilbúið árið 2015, jafnvel fyrr ef vel tekst til,“ segir Skúli Thoroddsen, framkvæmdastjóri Starfsgreinasambandsins. Hann segir koma til greina samstillt átak lífeyrissjóða og annarra fjárfesta við fjármögnun verkefnisins meðan kreppuástandið varir.

Framkvæmdastjóri Starfsgreinasambands Íslands, (SGS) skrifar um atvinnuástand og aðgerðir gegn atvinnuleysi í nýjum pistli. SGS hefur lagt á það áherslu að efla þurfi mannaflsfrekar framkvæmdir til að koma í veg fyrir stórfellt atvinnuleysi. Skúli segir byggingargeirann nú illa laskaðan, þar sé umtalsvert vinnuafl á lausu og verði áfram ef ekki er brugðist við.

„Landspítali háskólasjúkrahús er nú rekinn á um það bil eitthundrað stöðum í borginni. Nýtt fullkomið hátæknisjúkrahús, sem leysa mundi allar þessar byggingar af hólmi sparar líklega á bilinu 3 til 5 miljarða í rekstrarkostnaði á ári, með aukinni skilvirkni og hagkvæmni þess að starfsemin er á einum stað. Þjónusta við sjúklinga mundi stórbatna frá því sem nú er, sem og allt starfsumhverfi. Slíkt sjúkrahús og háskólastarfsemi yrði einnig öflugur bakhjarl mögulegrar útrásar á heilbrigðissviði, en þar liggja ótal tækifæri á ýmsum sérsviðum lækninga og heilsutengdrar þjónustu,“ segir Skúli.

Hann telur kostnað við sjúkrahúshlutann liggja nærri 70 milljörðum króna og háskólans allt að 40 milljörðum. Heildarkostnaður við framkvæmdina yrði því á bilinu 100-120 miljarðar á byggingatíma.

Skúli segir að umtalsverður rekstrarkostnaður sparist, svo framkvæmdin gæti greitt sig upp á 25-30 árum.

„Þá stendur eftir að meta þau verðmæti sem liggja í öðrum eignum Landspítala, en vel má hugsa sér spítalann við Fossvog undir aðra mikilvæga heilsutengda starfsemi eða öldrunarþjónustu,“ skrifar framkvæmdastjóri SGS.

Hann segir ennfremur að ríkissjóður sé ef til vill svo skuldsettur að ekki sé á bætandi en spyr um leið hvort við höfum efni á að grípa ekki til mannaflsfrekra verkefna, framkvæmda sem styrkja velferðarkerfið og draga úr umtalsverðu atvinnuleysi í leiðinni.

„Ef skilyrði Alþjóðagjaldeyrissjóðsins koma í veg fyrir aukna skuldsetningu ríkissjóðs af þessum ástæðum má hugsa sér samstillt átak lífeyrissjóða og annarra fjárfesta við fjármögnun verkefnisins meðan kreppuástandið varir. Mikilvægast er að hefjast handa um arðbær samfélagsleg verkefni, eins og umrætt sjúkrahús virðist vera frá mörgum sjónarhornum séð. Við ættum að hafa efni á því, en spurningin er um leiðir að settu marki. Að því verða stjórnvöld að vinna m.a. í samvinnu við aðila vinnumarkaðarins,“ segir framkvæmdastjóri SGS.

Heimasíða Starfsgreinasambands Íslands