Samningur um viðskipti Íslands og Bandaríkjanna

Skrifað var í dag undir rammasamning um samstarf um viðskipti og fjárfestingar á milli Íslands og Bandaríkjanna. Stjórnandi viðskiptaskrifstofu Bandaríkjanna fyrir Evrópu og Mið-Austurlönd, Christopher S. Wilson, og starfandi utanríkisráðherra, Össur Skarphéðinsson, undirrituðu samninginn.

Helsta markmið samningsins er að styrkja samstarf á milli íslenskra og bandarískra stjórnvalda á sviði viðskipta og fjárfestinga. Mælir samningurinn fyrir um stofnun formlegs samráðsvettvangs íslenskra og bandarískra stjórnvalda um viðskipti og fjárfestingar. Fulltrúar utanríkisráðuneytisins og viðskiptaskrifstofu Bandaríkjanna fara sameiginlega með formennsku á þessum vettvangi, en að öðru leyti er hann skipaður fulltrúum frá viðeigandi stofnunum eða einkaaðila, eftir atvikum.

Í tilkynningu frá utanríkisráðuneytinu segir, að ráðherrarnir vonist til að samráð á grundvelli samningsins styrki og auki viðskipti landanna. Þá lýsti starfandi utanríkisráðherra áhuga íslenskra stjórnvalda á að tryggja Íslendingum aðgang að sérstökum vegabréfsáritunum til Bandaríkjanna sem ætluð eru starfsmönnum erlendra fyrirtækja og fjárfestum.

Viðskipti landanna árið 2007 námu sem svarar til 100 milljörðum króna, þar af nam innflutningur frá Bandaríkjunum 75 milljörðum.

• 1 blogg um fréttina

Bloggað um fréttina

• Róbert Björnsson: Bilateral agreements and the EU - Icelandic Christian Conservatives - …