Fréttaskýring: Framsókn kveður fortíðina

Skilaboðin frá flokksþingi Framsóknar sem lauk í gær eru skýr: Nú verður gert upp við fortíðina og gengið í takt til móts við nýja tíma. Mikil spenna ríkti í Valsheimilinu alla helgina. Fyrst þurfti að takast á við Evrópumálin með málamiðlunarályktun um aðildarviðræður með skilyrðum. Skoðanir eru skiptar innan flokksins og meðal kjósenda en engu að síður var ályktunin samþykkt með miklum meirihluta atkvæða.

Þrátt fyrir smáspennufall var dramatíkinni ekki lokið. Framundan var kosning um embætti formanns, varaformanns og ritara flokksins.

Sigmundur Davíð Gunnlaugsson kom sterkur út úr kappræðum milli fjögurra af fimm formannsframbjóðendum á laugardag. Tillaga Páls Magnússonar um að formaður Framsóknar skyldi sækjast eftir embætti forseta Alþingis kæmist flokkurinn í ríkisstjórn, vakti verðskuldaða athygli. Eins og einn fulltrúa á þinginu orðaði það þá flutti Páll framboðsræðu en Sigmundur leiðtogaræðu. Því má svo bæta við að Höskuldur Þór Þórhallsson hafi haldið þingræðu sem hefði getað verið kröftugri.

Þá var spurningin: Hvað höfðar mest til framsóknarmanna?

Páll datt út í fyrstu umferð

Það kom því mörgum í opna skjöldu að Páll skyldi aðeins hljóta tæp 19% atkvæða í fyrstu umferðinni. Flestir voru sammála um að það væri ekki persóna Páls sem tapaði svo afgerandi heldur fortíð hans og tengsl við stóran valdahóp innan flokksins, sama hóp og er úthrópaður fyrir spillingu, pólitískar ráðningar og að hafa leitt þjóðina á þann stað sem hún er á núna.

Ekki hefð fyrir formannsslag

Í varaformannskosningunni í gær tókust á Siv Friðleifsdóttir og Birkir J. Jónsson. Siv spilaði inn á kynjasjónarmiðið, enda hefur Framsókn gefið sig út fyrir að stuðla að jafnrétti kynjanna og er t.a.m. með fleiri konur en karla í þingflokki sínum. Birkir sló hins vegar á ungliðastrengina en hann er tæplega þrítugur og hefur setið á þingi síðan árið 2003. Birkir hafði betur og Eygló Harðardóttir velti Sæunni Stefánsdóttur úr sæti ritara flokksins.

Kjördæmasjónarmiðið spilaði líka inn í kosningarnar. Formaðurinn er úr Reykjavík en alls óvíst er hvar hann færi fram í þingkosningum. Varaformaðurinn er úr Norðausturkjördæmi og ritarinn úr Suðurkjördæmi.

Þá er bara spurningin hvernig hin nýja Framsókn hugnast íbúum nýja Íslands.

Stjórnmálin brugðust

Sigmundur Davíð Gunnlaugsson, nýr formaður Framsóknarflokksins.