Kaupmáttur launa dróst saman um 8,2%

Launavísitala í desember 2008 var 353,6 stig og hækkaði um 0,7% frá fyrri mánuði, samkvæmt upplýsingum Hagstofunnar. Síðastliðna tólf mánuði hefur launavísitalan því hækkað um 8,3%. Kaupmáttur launa hefur hins vegar dregist saman um 8,2% síðustu 12 mánuði.

Vísitala kaupmáttar launa í desember var 109,0 stig og lækkaði um 0,9% frá fyrri mánuði.

Fram kemur á vef hagstofunnar að samkvæmt kjarasamningum Launanefndar sveitarfélaga og helstu viðsemjenda, sem undirritaðir voru á tímabilinu frá miðjum nóvember fram í byrjun desember, hafi laun félagsmanna hækkað um 20.300 krónur frá 1. nóvember 2008. Sambærilegir samningar hafi verið undirritaðir á milli annarra viðsemjenda á vettvangi sveitarstjórnarstigsins.

Samkvæmt kjarasamningi Samtaka starfsmanna fjármálafyrirtækja og Samtaka atvinnulífsins sem undirritaður var þann 5. desember sl. hækkuðu laun félagsmanna um 20.500 krónur frá 1. nóvember 2008. Mánaðarlaun yfir 450.000 krónum tóku ekki breytingum samkvæmt þessu ákvæði samningsins.