Dómstólaleiðin framundan

Fjöldi manns, á að giska 600-700, mætti á opinn fund sem samtökin Réttlæti.is héldu í gærkvöldi í Íþróttahöllinni í Laugardal.  Að sögn Ómars Sigurðssonar, eins forsvarsmanna samtakanna, voru fundarmönnum kynntar aðgerðir samtakanna undanfarna tvo mánuði. Þar tók einnig  hæstaréttarlögmaðurinn Hilmar Gunnlaugsson við umboðum frá hundruðum manna til að reka mál þeirra gagnvart bankanum.

Ómar segir að meirihluti fundargesta hafi verið ellilífeyrisþegar, sem hafi tapað hluta ævisparnaðar síns í peningamarkaðssjóðunum. „Þeir sem tóku til máls þarna voru eldri borgarar sem eru hættir að vinna og höfðu önglað saman kannski sex, átta milljónum á heilli starfsævi og töpuðu einum þriðja af því.“