Dvöl fanga á áfangaheimili í uppnámi

„Föngum, sem eru á leið út úr fangelsum en hafa ekki atvinnu, er synjað um dvöl á áfangaheimili en geymdir í staðinn í fangelsum þar til afplánun lýkur. Við svo búið eru þeir sendir út í atvinnuleysið,“ segja fulltrúar Afstöðu, félags fanga. Afstaða segir fanga ekki efsta á blaði atvinnurekenda og fangar hlaupi ekki í vinnu í dag. Atvinna er hins vegar eitt skilyrði þess að fangar verði vistaðir á áfangaheimili Verndar.

Á vef Afstöðu, timamot.is er fjallað um lokahluta afplánunar refsivistar. Sú regla gildir á Íslandi að fangar eiga rétt á því að ljúka síðustu vikum eða mánuðum afplánunar sinnar á áfangaheimili Verndar, gegn því að þeir stundi vinnu eða nám. Hugmyndin á bak við tilhögunina er sú að undirbúa fanga undir losun og því er um aðlögun að samfélagi að ræða. Afstaða segir þetta úrræði í uppnámi vegna efnahagshrunsins og ört vaxandi atvinnuleysis.

„Þessi staða, líkt og mörg önnur staða í fangelsismálum á krepputímum, er hættuleg. Þeir fangar sem ekki fá vistun á áfangaheimili Verndar eiga varla von um að aðlagast samfélaginu. Og í dag bíða þeirra mun erfiðari aðstæður en þeir komu úr þegar afplánun hófst og því þarf varla að spyrja að framhaldinu,“ skrifar fulltrúi Afstöðu.

Vefur Afstöðu

• 1 blogg um fréttina

Bloggað um fréttina

• Baldur Sigurðarson: Hvað kostar hver fangi?