Óvenju mikið um erlenda ferðamenn

Starfsmenn upplýsingamiðstöðvar ferðamanna í Reykjavík telja að óvenju mikið sé um erlenda ferðamenn um þessar mundir, á árstíma sem alla jafna er fremur rólegur í ferðaþjónustu.

Tekið var á móti 30% fleiri gestum í miðstöðinni í september, október og nóvember 2008 ef bornir eru saman mánuðir milli ára 2007 og 2008. Desembermánuður sló hins vegar öll fyrri met um aukinn gestafjölda með 43% fjölgun heimsókna miðað við 2007.

Þrátt fyrir að fjölgun erlendra ferðamanna allt árið 2008 hafi verið minni en undanfarinn áratug - um 3% í stað um það bil 8% fjölgunar að jafnaði sl. 10 ár samkvæmt upplýsingum frá Ferðamálastofu - virðist sem þeir leiti meira til upplýsingamiðstöðva og bóki þar sínar ferðir, gistingu og aðra þjónustu. Það er, skv. upplýsingum frá miðstöðinni, í takt við þá þróun í ferðaþjónustu, bæði hérlendis og annarstaðar, að ferðamenn verða sífellt sjálfstæðari í sinni skipulagningu auk þess sem þeir eru hvatvísari í ferðakaupum og kaupi til að mynda helgarferð með afar skömmum fyrirvara ef hún gefst á hagstæðu verði.

Mikið spurt um norðurljósin

„Starfsfólk upplýsingamiðstöðvarinnar telur að óvenju mikið sé um erlenda ferðamenn um þessar mundir, á árstíma sem alla jafna er fremur rólegur í ferðaþjónustu. Þeir séu spenntir fyrir hefðbundnum kynnisferðum, svo sem í Bláa lónið og á Gullfoss og Geysi. Einnig er mikið spurt um norðurljósin og ýmsar ferðir þeim tengdar. Þá er einnig mikið spurt um söfn og sýningar af ýmsu tagi, lifandi tónlist, veitingastaði, sundlaugar og heimsóknir í heilsulindir. Ennfremur seljast dýrari ferðir, svo sem jeppaferðir með fáa farþega, betur nú en oft áður og að fólk setji verðlagið síður fyrir sig,“ segir í frétt frá Upplýsingamiðstöðinni.

Þar segir einnig: „Endurgreiðsla á virðisauka til erlendra ferðamanna jókst að sama skapi gríðarlega og því ljóst að sala á ýmsum vörum til þessa hóps hefur aukist mikið. Endurgreiðsla Iceland Refund í upplýsingamiðstöðinni í október og nóvember jókst að meðaltali um 194% milli ára 2007 og 2008. Í takt við metfjölda í upplýsingamiðstöðinni í desember varð alger sprengja í endurgreiðslu virðisauka til erlendra ferðamanna í þeim mánuði eða 400% og því líklegt að töluvert margir hafi keypt jólagjafir í borginni áður en haldið var heim.“

• 1 blogg um fréttina

Bloggað um fréttina

• Baldvin Jónsson: Hvar eru allir þessir ferðamenn??