Grænfriðungar fordæma hvalveiðar Íslendinga

„Að okkar mati þá er þetta blygðunarlaus aðgerð af hálfu fráfarandi ríkisstjórnar,“ segir Dave Walsh, hjá Greenpeace International, spurður út í ákvörðun fráfarandi sjávarútvegsráðherra, Einars K. Guðfinnssonar, að heimila hvalveiðar í atvinnuskyni.

„Hvalveiðar í atvinnuskyni munu hafa neikvæð áhrif á Ísland, og þær munu svo sannarlega ekki bæta efnahagsástandið. Íslendingar ættu fremur að einblína á það að efla ferðamannaiðnaðinn og hvalaskoðun, í stað þess að veiða hvali,“ segir Walsh og bætir við að þetta varði ekki síst ímynd Íslands út á við.

Ný ríkisstjórn er í smíðum og að sögn Walsh verður hún beðin um að hverfa frá þessari ákvörðun. „Við teljum að þessi ákvörðun hafi verið tekin til að koma nýju stjórninni í óþægilega stöðu. Við vonum því að nýja ríkisstjórnin muni snúa við ákvörðuninni sem fyrst.“

Verði ákvörðuninni ekki hnekkt munu samtökin halda áfram að beita íslensk stjórnvöld þrýstingi að sögn Walsh.

• 3 blogg um fréttina

Bloggað um fréttina

• Jóhann Elíasson: Þetta fer nú að verða eins og að hlusta á …
• Sverrir Þór Magnússon: Er þetta grín ?
• Axel Þór Kolbeinsson: Sumir hafa ekki verið að fylgjast með fréttum.