Hætt við þriggja hæða mislæg gatnamót

Borgarráð staðfesti á fundi sínum í dag að horfið hefur verið frá þriggja hæða mislægum gatnamótum við Miklubraut og Kringlumýrarbraut.  Þriggja hæða mislæg gatnamót voru eitt helsta stefnumál Sjálfstæðisflokksins og Framsóknarflokksins í síðustu borgarstjórnarkosningum, að því er segir í tilkynningu frá Degi B. Eggertssyni, oddvita Samfylkingarinnar í borgarstjórn.

„Borgarráð var með ákvörðun sinni að staðfesta niðurstöðu samráðshóps um umferðarmál á gatnamótunum en hann var settur á fót á síðasta ári að tillögu Samfylkingarinnar. Eftir að hópurinn hafði farið yfir umferðartölur og önnur gögn náðist samstaða um að í stað mislægra gatnamóta á þremur hæðum yrði Miklabraut lögð í stokk en núverandi gatnamót héldu sér að öðru leyti. Útfærsla þessa efnis var lögð fram í samráðshópnum af fulltrúum íbúasamtaka Hlíðahverfis.

Áðurnefnd niðurstaða telst ótvírætt til tímamóta. Vaknar sú spurning að með henni hafi Sjálfstæðisflokkurinn tekið upp ný viðhorf í samgöngu- og skipulagsmálum Reykjavíkur. Er ástæða til að taka undir orð Gísla Marteins Baldurssonar borgarfulltrúa sem var formaður samráðshópsins um að sérstakt fagnaðarefni sé að þetta áratuga deilumál hafi nú leyst í sátt. Fulltrúi Samfylkingarinnar í samráðshópnum var Stefán Benediktsson varaborgarfulltrúi og arkitekt," að því er segir í tilkynningu frá Degi.

Sameiginleg bókun borgarráðs var svohljóðandi:

„Borgarráð fagnar niðurstöðu starfshópsins og þeirri lausn sem þar er kynnt vegna framkvæmda við Miklubraut/Kringlumýrarbraut. Borgarráð þakkar starfshópnum góð störf og þá samstöðu sem nú hefur, með þverpólitísku samráði og öflugri aðkomu íbúasamtaka, verið tryggð um þetta brýna hagsmunamál borgarbúa."

• 2 blogg um fréttina

Bloggað um fréttina

• Hallur Magnússon: Dagur B. Eggertsson nýr blaðafulltrúi borgarráðs?
• Íbúasamtök 3. hverfis: Hlíðarnar sameinaðar - loksins