Óska eftir niðurfellingu skulda Bolungarvíkur

Eftirlitsnefnd með fjármálum sveitarfélaga hefur farið fram á það að Sparisjóður Bolungarvíkur endurskoði vaxtakjör afturvirkt á viðskiptareikningi Bolungarvíkur og/eða felli niður lán allt að 15 milljónum króna. Einnig hefur nefndin lagt til við Íbúðalánasjóð að hann aflétti skuldum vegna félagslegra íbúða hjá Bolungarvík að fjárhæð 146 m.kr. Þetta kemur fram á vef Bæjarins besta.

Eftirlitsnefndin hefur einnig lagt til við samgönguráðherra að sveitarfélaginu verði veittur styrkur úr Jöfnunarsjóði sveitarfélaga, allt að 67 m.kr., sem nýttur verði til að greiða niður eftirstöðvar skulda sem sveitarsjóður hefur tekið að láni hjá Sparisjóði Bolungarvíkur og Landsbanka Íslands vegna félagslega húsnæðiskerfisins. Hluta framlagsins verði varið til að standa straum af kostnaði vegna sérfræðivinnu við fjárhagslega ráðgjöf til Bolungarvíkur.

Nefndin fer einnig fram á að umhverfisráðuneytið endurgreiði Bolungarvík 24 m.kr. sem sveitarfélagið hefur lagt til Náttúrstofu Vestfjarða í Bolungarvík umfram það sem samningur við ráðuneytið segir til um. Þetta kemur fram í bréfi nefndarinnar til samgönguráðherra. Jafnframt leggur nefndin til að undirbúningur verði hafinn á sameiningu Bolungarvíkur og Ísafjarðarbæjar.

„Tillögur Eftirlitsnefndar með fjármálum sveitarfélaga (EMFS) um 250 mkr. skuldalækkun og 140 mkr. lánveitingu, falla vel að markmiðum samnings bæjarstjórnar við EMFS, sem undirritaður var þann 7. október 2008, um niðurgreiðslu skulda og endurskipulagningu í fjármálum og eignastýringu sveitarfélagsins,“ segir í bókun meirihluta bæjarráðs Bolungarvíkur um bréf EMFS til samgönguráðherra. Segir meirihlutinn tillögurnar ásamt fjárhagsáætlun Bolungarvíkurkaupstaðar 2009 falla vel að markmiðum meirihluta bæjarstjórnar Bolungarvíkur um ábyrga fjármálastjórn, aðhald í rekstri og endurfjármögnun óhagstæðra lána sveitarfélagsins, að því er segir í frétt BB.

• 1 blogg um fréttina

Bloggað um fréttina

• Héðinn Björnsson: Get ég fengið þessa til að semja um lánin mín?