Útlit er fyrir að ekki takist að endurfjármagna nýju ríkisbankana þrjá, Nýja Glitni, Nýja Kaupþing og NBI, sem stofnaður var úr gamla Landsbankanum, á þeim tíma sem að er stefnt samkvæmt áætlun sem íslensk stjórnvöld og Alþjóðagjaldeyrissjóðurinn (IMF) vinna eftir. Áætlunin gerir ráð fyrir að mati á eignum og skuldum gömlu og nýju bankanna, og hvernig þær skiptast á milli bankanna, verði lokið í lok febrúar.

Samkvæmt heimildum Morgunblaðsins er fyrirséð að þetta markmið mun ekki nást fyrr en seint í apríl eða um tveimur mánuðum síðar en áætlanir gerðu ráð fyrir. Vinna við matið er mun tímafrekari og umfangsmeiri en gert var ráð fyrir. Mikil áhersla er þó lögð á að flýta vinnu við mat á eignum og skuldum sem allra mest svo mögulegt sé að veita heimilum og fyrirtækjum sem allra besta þjónustu á erfiðum tímum og bankarnir geti staðið á eigin fótum.

Alþjóðlega ráðgjafafyrirtækið Oliver Wyman, sem mótaði verklagið sem stuðst hefur verið við við mat á eignum og skuldum, mun að lokum yfirfara niðurstöður matsins áður en bönkunum verður lagt til eigið fé. Samkvæmt áætlunum á eiginfjárhlutfall bankanna að vera að minnsta kosti 10 prósent eftir að þeir hafa verið endurfjármagnaðir. Áætlanir gera ráð fyrir að ríkið þurfi að leggja bönkunum til 385 milljarða króna.

Tengdar fréttir

Bankakreppa

Biðu sömu örlaga og Ísland

• Vilja að bankarnir endurgreiði aðstoðina
• Merki um siðrof í þjóðfélaginu
• Eignir metnar á 775 milljarða
• Auknar álögur á íbúa Grimsby

» Fleiri tengdar fréttir