Vill ekki að Írlandi sé líkt við Ísland

Brian Cowen, forsætisráðherra Írlands, tók það óstinnt upp þegar José Manuel Barroso, forseti framkvæmdastjórnar Evrópusambandsins, bar saman Ísland og Írland á fundi heimsviðskiptastofnunarinnar í Davos í Sviss í vikunni.

„Það er athyglisvert að bera saman Írland og Ísland," sagði Barroso. „Þetta eru tvö lítil hagkerfi en munurinn var meðal annars, að Írland er á evrusvæðinu og notar því viðurkenndan gjaldmiðil.

Raunar hefur Ísland kannað óformlega möguleikann á að taka upp evru. Við höfum sagt stjórnvöldum á Íslandi að það sé ekki hægt að ganga í myntbandalagið nema sem aðili að Evrópusambandinu," sagði Barroso.

Cowen brást illa við þessum orðum, og sagðist ekki líða að talað væri illa um Írland. Þá væri samanburður Barroso ekki réttur í ljósi þess, að Írland hefði notið efnahagsuppgangs undanfarin 12-13 ár.

Í vikunni kom fram hjá Cowen á írska þinginu, að útlitið í írskum efnahagsmálum er afar dökkt, útlit er fyrir 10% samdrátt þjóðartekna til ársins 2010, stórauknu atvinnuleysi og fjárlagahalla. Sagði Cowen að alþjóðlegu fjármálakreppunni væri um að kenna.

• 2 blogg um fréttina

Bloggað um fréttina

• Jenný Anna Baldursdóttir: Líku saman að jafna?
• Snjólaug A. Sigurfinnsdóttir: Því ekki Írland