Innlent | mbl | 5.2.2009 | 13:30

Olli Rehn stendur fast á sínu

Olli Rehn, stækkunarstjóri ESB. Reuters

Olli Rehn, stækkunarstjóri Evrópusambandsins, hefur ítrekað að hann telji áfram að Ísland yrði kærkomið nýtt aðildarríka bandalagsins, að því er fram kemur í finnska dagblaðinu Helsinki Sanomat.

Þessu ummæli fóru fyrir brjóstið á forseta Evrópuþingsins, hægrimanninum Hans-Gert Pöttering og sagt var frá hér á mbl.is í gær. Í samtali sem birtist í blaðinu Aamulethi sagði Pöttering að tal af þessu tagi gæti torveldað staðfestingu Lissabon-sáttmálans, sérstaklega á Írlandi þar sem kosið verður um hann á ný næsta haust.

Rehn segir að staðfesting sáttmálans sé ekki síður grundvallarmál fyrir framkvæmdastjórnina. Í augum hans er það þó eðlilegt að framkvæmdastjóri stækkunarmála taki þátt í umræðum um það sem hefur verið að gerast á síðasta ári varðandi stækkunarmál.

„Öll Evrópuríki sem mæta skilyrðunum um lýðræði og löggjöfina og framkvæmir þau í reynd, geta sótt um aðild að ESB. Ísland fellur betur undir þessa skilgreiningu heldur en Balkanlöndin til dæmis,“ sagði Olli Rehn í viðtali í Helsinki Sanomat.

Stækkunarstjórinn bendir á að Ísland fullnægi nú þegar öllum lýðræðislegum skilgreiningum ESB. Það sé einnig aðili að Evrópska efnahagssvæðinu og að minnsta kosti tveir þriðju af löggjöf ESB sé þar þegar í gildi.

Rehn gerir ráð fyrir að með því að Ísland hefji umsóknarferlið og vilji til að gangast undir skilgreingu aðildar á evrusvæðinu gæti einnig ýtt undir stöðugleika í efnahagsmálum landsins sem nú glími við alvarlegan vanda á því sviði.