Innlent | mbl | 9.2.2009 | 15:45

Vill fjölga norrænum sendiráðum

Össur Skarphéðinsson utanríkisráðherra telur að með sameiginlegum rekstri sendiráða geti Norðurlöndin sparað umtalsverðar fjárhæðir. mbl.is/Dagur

„Ein tillagan sem að er mjög æskileg frá sjónarhóli okkar varðar stóraukið samstarf á sviði utanríkisþjónustu. Í því gæti falist, til dæmis, aukið samstarf við rekstur sendiráða. Það er mjög góð reynsla af því að hafa öll norrænu sendiráðin saman í Berlín,“ segir Össur Skarphéðinsson utanríkisráðherra, um tillögu sem rædd var á ráðherrafundi í Ósló í dag.

Tilefni fundarins var ný skýrsla Thorvalds Stoltenbergs, fyrrverandi utanríkis- og varnarmálaráðherra Noregs, um leiðir til aukins samstarfs Norðurlandanna í varnar- og öryggismálum á Norðurslóðum.

Var skýrslan unnin í samvinnu við sérfræðinga í Finnlandi, Svíþjóð, Danmörku, Noregi og á Íslandi og voru Kristrún Heimisdóttir og Guðmundur Alfreðsson fulltrúar íslenska utanríkisráðuneytisins í samstarfinu.

Össur segist hafa lagt áherslu á að hugmyndin verði tekin til skoðunar.

„Ég lagði mikla áherslu á að þetta yrði skoðað í þaula og dró enga dul af því að fyrir litla þjóð eins og Ísland, sem þyrfti að draga saman seglin í kreppu, yrði þetta mjög öflug lausn við að halda úti víðfeðmu neti sem að kostaði lítið.

Þetta er af þeirra hálfu ekki síður hugsað þannig að í heimshlutum sem eru fjarri Norðurlöndunum að þar væri mjög gott fyrir Norðurlöndin að starfrækja öfluga útstöð.

Okkar sýn er hins vegar sú að þetta ætti að skoða miklu nær okkur.“