Innlent | mbl | 10.2.2009 | 16:01

Megi stunda nám

Atvinnuleysi vex dag frá degi á Íslandi Reuters

„Ég tel það muni skipta sköpum fyrir þann sem er í þeirri stöðu að hafa verið á vinnumarkaði og orðið atvinnulaus, að hann geti haft þær tekjur sem atvinnuleysisbætur þó eru,“ segir Kristinn H. Gunnarsson, þingmaður Frjálslynda flokksins. Hann lagði í dag fram frumvarp á Alþingi sem gerir ráð fyrir að atvinnulausum verði heimilt að stunda nám og halda bótum í allt að tvö ár.

Kristinn segir fyrirsjáanlegt að umtalsvert atvinnuleysi verði á næstunni. Áætlað sé að það geti verið um 9% næstu tvö árin eða um 15.000 manns.

„Slíkar tölur hafa ekki sést hér á landi um langt árabil sem betur fer og stjórnvöld verða að grípa til allra tiltækra ráða til þess að koma í veg fyrir að slíkt atvinnuleysi festist í sessi,“ segir Kristinn.

Hann segir úrræðin um margt hefðbundin og þá fyrst og fremst þau að efla atvinnuvegina og skapa ný störf með nýrri framleiðslu. Nýta auðlindir lands og sjávar eftir föngum og láta ekki þröngsýni og fordóma koma í veg fyrir skynsama atvinnustefnu.

„En því þarf líka að fylgja að mennta vinnuaflið til annarra starfa svo fólkið geti tekist á við breyttar aðstæður og nýtt sér nýja möguleika,“ segir Kristinn H. Gunnarsson.

Í frumvarpi hans er lagt til að Vinnumálastofnun fái heimild til að veita undanþágu frá skilyrði um virka atvinnuleit þannig að atvinnulaus maður geti farið í nám í allt að tvö ár og haldið atvinnuleysisbótum sínum. Námið á að nýtast viðkomandi beint í atvinnuleit og á að vera til þess að veita aukin starfsréttindi, auka hæfni til starfa og bæta vinnufærni, svo sem iðnnám eða meistaranám.

„Að jafnaði er viðkomandi búinn að stofna heimili og koma sér upp fjölskyldu og ber umtalsverðar skuldbindingar þess vegna. Nám í tvö ár yrði þungur baggi ef það yrði fjármagnað að fullu með námslánum og mörgum ókleift. Frumvarpið er flutt til þess að bæta úr,“ segir Kristinn.

Heimildin er einna helst hugsuð fyrir þann hóp atvinnulausra sem einungis býr yfir grunnmenntun til að bæta við nám sitt og auka þannig líkur á að finna starf. Samkvæmt tölum Hagstofunnar frá árinu 2007 voru 28% einstaklinga á vinnumarkaði á aldrinum 20–64 ára án viðurkenndrar starfs- og framhaldsskólamenntunar. Þetta samsvarar 45 þúsund manns. Að sama skapi er hlutfall þeirra mjög hátt meðal atvinnulausra, en tæp 60% atvinnulausra í lok árs 2008 voru einungis með grunnskólamenntun. Kristinn segir mikilvægt að bæta úrræði þessara einstaklinga til að auka vinnufærni sína með því að bæta við námsúrræðum.

Frumvarp Kristins H. Gunnarssonar