Innlent | mbl | 25.2.2009 | 15:06

Vilhjálmur Þ.: Faglega staðið að leigu húsnæðis fyrir borgina

Reykjavíkurborg leigir allar hæðir Borgartúns 10-12. mbl.is/Kristinn

Vilhjálmur Þ. Vilhjálmsson, forseti borgarstjórnar og fyrrum borgarstjóri, segir að faglega hafi verið staðið að leigu húsnæðis fyrir starfsmenn borgarinnar í Borgartúni 10-12. Hann segir að samningurinn við Höfðatorg ehf. hafi verið mjög hagstæður, en meðtaltalsleiguverðið var 1.855 kr. á fermetra árið 2007.

Hann bendir á í samtali við mbl.is að í lok október sama ár, þegar Dagur B. Eggertsson var borgarstjóri, hafi verið gerður viðbótarleigusamningur þar sem meðaltalsleiguverðið hafi verið hærra, eða 2.318 kr. á fermetra.

Hann segir jafnframt að árið 2007 hafi eignir borgarinnar verið seldar þegar fasteignaverð var í sögulegu hámarki á Íslandi. „Eignirnar voru greiddar út í hönd í apríl 2007. Reykjavíkurborg hefur því notið verulegra fjármagnstekna þann tíma sem liðinn er frá því þær voru seldar, og salan því afar hagstæð,“ segir Vilhjálmur.

Hann bendir á að allar tillögur að málinu hafi verið unnar með fyrirvara um samþykki borgarráðs. Allt hafi því verið uppi á borðum.

Vilhjálmur tekur fram að starfsmenn borgarinnar hafi unnið mjög vel að undirbúningi málsins og vandað til allra verka í þeim tilgangi að „ná sem bestri niðurstöðu fyrir borgina“.

Vilhjálmur var beðinn um að svara nokkrum spurningum, með vísun í fundargerð borgarráðs frá 8. mars 2007, í tengslum við aðdraganda þess að borgin tók á leigu húsnæði við Höfðatorg.

Forsaga málsins
Var ekki leitað tilboða?
Hví var ákveðið að leigja frekar en kaupa?
Hver tók þá ákvörðun að ræða beint við Eykt?
Borgarráðsfulltrúar Samfylkingarinnar létu bóka á fundi borgarráðs 8. mars 2007 að þeir hefðu haft spurnir af því að byrjað var að ræða við Eykt án þess að málið hefði verið kynnt borgarráði. Málið hafi aldrei komið til kynningar í borgarráði. Er þetta rétt?
Þá vekja sömu borgarráðsfulltrúar athygli á því að eignir borgarinnar sem voru seldar stóðu á lóðum þar sem skipulag gerir ráð fyrir meira byggingarmagni. Engar tilraunir hafi verið gerðar til að meta þann byggingarrétt til hækkunar á verði. Er þetta rétt?