Ekki gott fyrir fólkið sameinist ríkisbankar

Ekki eru góð tíðindi fyrir neytendur eða atvinnulífið verði frekari samþjöppun á bankamarkaði.  Þetta segir Páll Gunnar Pálsson, forstjóri Samkeppniseftirlitsins. „Það er eðli málsins samkvæmt.“

Eftirlitið hefur ekki verið beðið um að taka sameiningu ríkisbanka til skoðunar, en um það er rætt; síðast á Alþingi á þriðjudag. Engar ákvarðanir liggja þó fyrir. Samkeppnisráð hafnaði fyrirhuguðum samruna ríkisbankanna Búnaðarbanka Íslands hf. og Landsbanka Íslands hf. árið 2000, þar sem hann hefði skaðleg áhrif á samkeppni og bryti í bága við samkeppnislög.

Í áliti Samkeppnisráðs stendur að samruninn hefði leitt til of mikillar samþjöppunar og markaðasráðandi stöðu á markaði fyrir innlán og útlán, greiðslumiðlunarmörkuðum og markaði fyrir verðbréfa- og gjaldeyrisviðskipti.

Páll Gunnar segir ekki hægt að útiloka fyrirfram að unnt sé að heimila einhverskonar samþjöppun á markaðnum í dag. „Samkeppnisyfirvöld verða að taka afstöðu til hvers máls fyrir sig,“ segir Páll Gunnar. „Samkeppnisrétturinn virkar þannig að huga þarf að viðkomandi samruna við þær aðstæður sem eru uppi hverju sinni.“