Versta seðlabankastjóraembætti á Vesturlöndum

Fær versta seðlabankastjóraembætti á Vesturlöndum. Þetta er fyrirsögn á frétt sem Sigurd Bjørnestad, blaðamaður norska blaðsins Aftenposten, skrifar á viðskiptavefinn E24. Bjørnestad sat blaðamannafund landa síns Svein Harald Øygard, sem í Seðlabanka Íslands en Øygard var í morgun settur tímabundið í embætti seðlabankastjóra.

Bjørnestad segir, að það sé kalt úti fyrir byggingu íslenska seðlabankans, sem líkist sprengjubyrgi. Inni sitji  Øygard á blaðamannafundi og útskýri hvers vegna hann sé með réttu reynsluna til að leiða Ísland út úr því fjármálafárviðri, sem þar ríki.

Þá segir blaðamaðurinn, að blaðamannafundurinn hafi verið haldinn í gluggalausu herbergi. Það sé kaldhæðnislegt í ljósi þess að Ísland hafi þurft að leita út fyrir landsteinana til að finna seðlabankastjóra til bráðabirgða.

Á blaðamannafundinum sagði Øygard, að framtíðarhorfur Íslands væru góðar. Því til stuðnings nefndi hann, að afgangur hefði verið á rekstri ríkissjóðs áður en bankarnir hrundu, íslenskt vinnuafl sé vel menntað og Íslendingar séu vanir sveiflum og mikilli vinnu.

Hann sagði að mikilvægustu verkefnin séu að auka traust á íslensku krónunni og styrkja hana. Það leggi grundvöll að því að hægt verði að aflétta gjaldeyrishöftum. Þá þurfi að tryggja að bankakerfið sé vel starfhæft.

• 2 blogg um fréttina

Bloggað um fréttina

• Jakob Falur Kristinsson: Versta embættið á Vesturlöndum
• Gunnar Th. Gunnarsson: Heillaóskir