Reyndi að klippa gat á girðinguna

Maður var tekinn í nótt við tilraun til að brjótast inn á Litla-Hraun. Að sögn lögreglunnar á Selfossi eru þekktar nokkrar tilraunir til að brjótast þaðan út, en mun sjaldgæfara er að menn reyni að brjótast inn í fangelsið. Hann gistir nú fangageymslur lögreglunnar.

Fangaverðir á Litla-Hrauni sáu í eftirlitsmyndavélum hvar maðurinn var með vírklippur að munda sig við að klippa gat á girðinguna sem umlykur fangelsið. Lögreglan var kölluð til og handtók manninn. Hann var þá búinn að vinna nokkuð tjón á girðingunni. 

Að sögn lögreglu var maðurinn talsvert ölvaður og ekki með það alveg á hreinu hvað honum gekk til með tiltækinu. Hann sefur nú úr sér á Selfossi og verður yfirheyrður þegar af honum rennur.

• 4 blogg um fréttina

Bloggað um fréttina

• Jenný Anna Baldursdóttir: Til hamingju ég sjálf!
• Jóhann Elíasson: Kannski var hann að sækja í ÖRYGGI?????
• Benedikt Bjarnason: Flest dettur mönnum í hug.
• Einar B Bragason : Að brjótast inn eða út er auðskilið