Fengu grein birta í virtu riti

Þrír íslenskir vísindamenn við Háskólann í Reykjavík, Álfgeir Logi Kristjánsson, Inga Dóra Sigfúsdóttir og Þórólfur Þórlindsson, fengu grein sem birta í alþjóðlega tímaritinu Health Promotion International. Greinina skrifuðu þau í samstarfi við tvo bandaríska fræðimenn, Kathleen M. Roe og John P. Allegrante.

Í greininni (Substance use Prevention for adolescents: the icelandic model) er fjallað um forvarnarmál og hvernig áherslur íslenska kerfisins svokallaða, hafa reynst. Samkvæmt kerfinu er lögð áhersla á að koma í veg fyrir að ungmenni neyti vímuefna. Öðru fremur er byggt á samstarfi þeirra sem koma að starfi með ungmennum, upplýsinga aflað og fylgst náið með þróun þeirra. Með því að samtvinna þverfaglega þekkingu þeirra sem að málinu koma næst góð greining á áhættuþáttum, sem taldir eru geta leitt til vímuefnanotkunar, að sögn Álfgeirs Loga Kristjánssonar. „Þetta [birting greinarinnar innsk. blm.] skiptir auðvitað máli og vekur athygli á rannsóknum sem skipta miklu máli,“ sagði Álfgeir Logi í samtali við mbl.is

Í tímaritinu, sem er meðal virtustu fræðirita á sviði lýðheilsufræða í heiminum, eru aðeins birtar greinar sem uppfylla gæðastaðla ritstjórnar tímaritsins.

Kerfið hefur verið í þróun á löngum tíma, eða í 10 til 12 ár. Það hefur vakið athygli og er notað sem fyrirmynd forvarnarverkefnisins Youth in Europe, sem ýmsar borgir Evrópu eiga aðild að.

• 1 blogg um fréttina

Bloggað um fréttina

• Ólafur Ingólfsson: Undarleg frétt