Gunnlaugur: Erum ekki fjármálafyrirtæki

Gunnlaugur Sævar Gunnlaugsson, formaður stjórnar Ísfélags Vestmannaeyja,  segir að rekja megi uppsagnir tveggja yfirmanna fyrirtækisins til þess að stjórnin telji þá hafa farið út fyrir valdsvið sitt með gerð afleiðusamninga við íslenska banka. Ekki sé grunur um glæpsamlegt athæfi eða að mennirnir hafi reynt að hagnast persónulega.

„Við teljum að umræddir starfmenn hafi gert mistök í starfi og að ekki sé forsvaranlegt annað en að þeir sæti ábyrgð vegna þeirra. Við erum sjávarútvegsfyrirtæki en ekki fjármálafyrirtæki og því telur stjórnin umfang umræddra samninga  hafa verið langt umfram það sem eðlilegt geturtalist," sagði hann er blaðamaður mbl.is ræddi við hann í dag.

„Það getur vel verið eðlilegt að útflutningsfyrirtæki reyni að tryggja sig gegn gengissveiflum með slíkum samningum en þessir samningar eru langt utan eðlilegra marka. Okkar starf er að veiða, vinna og selja fisk og það er því annarra að reyna að hagnast á fjármálabraski.” 

Gunnlaugur segir ekki liggja fyrir hversu mikið tap fyrirtækisins verði vegna þessa. Þó sé ljóst að það muni nema hundruð milljónum króna. Þá segir hann stjórn fyrirtækisins ekki hafa fengið upplýsingar um umrædda samninga eða það hversu stórir þeir væru fyrr en mjög nýlega. Hún hafi því ekki gert sér grein fyrir umfangi þeirra. 

Gunnlaugur segir nú standa til að auglýsa störf mannanna og að hann muni ásamt góðum samstarfsmönnum innan fyrirtækisins hafa yfirumsjón með daglegum rekstri þess á meðan það ferli eigi sér stað.

• 3 blogg um fréttina

Bloggað um fréttina

• Gísli Foster Hjartarson: Af(vega)leiðusamningar
• Eggert Þór Aðalsteinsson: Hver er ábyrgð félagsstjórnar?
• Sigurður Sigurðsson: Heyr, heyr, þetta líkar mér að heyra !!!!