Ný lausn erlendra lána

Íslandsbanki hyggst bjóða viðskiptavinum sínum sem tóku húsnæðislán í erlendri mynt upp á nýtt afborgunarúrræði, sem hægt verður að sækja um þegar í næstu viku.

Um er að ræða eins konar greiðslujöfnun sem gengur út frá afborgunarbyrði eins og hún var á lánunum 1. maí 2008. Munurinn á greiðslunum og því sem viðskiptavinurinn ætti að greiða bætist aftan við lánið og lengir þannig lánstímann.

Hugmyndin er að upphæð afborgana þróist svo í takt við svokallaða greiðslujöfnunarvísitölu í stað hefðbundinnar neysluvísitölu. Munurinn á greiðslubyrðinni er um 10% um þessar mundir, eftir því við hvora vísitöluna er miðað. Áætlað er að munurinn verði enn meiri eftir því sem á árið líður.

Annað úrræði sem er komið mun skemmra á veg gengur út á að búið verði til svokallað skuggalán, sem miðast við að húsnæðislánið hafi á sínum tíma verið innlent verðtryggt lán. Greiðandinn borgar þá samkvæmt skuggaláninu en þegar höfuðstólar lánanna tveggja mætast er raunverulega lánið, þ.e. hið erlenda, greitt upp með nýju innlendu láni.