Viðbrögð skólastjórnenda til fyrirmyndar

Starfsfólk Grunnskólans í Sandgerði hefur sent frá sér yfirlýsingu þar sem lýst er stuðningi við yfirstjórn skólans í máli, sem nýlega kom þar upp. Segir í yfirlýsingunni að Viðbrögð yfirstjórnar skólans í þessu máli hafi verið til fyrirmyndar og unnin í nánu samstarfi við foreldra og aðra sem málið varði. 

Yfirlýsingin er eftirfarandi: 

„Við starfsfólk Grunnskólans í Sandgerði hörmum þá umfjöllun sem skólinn og yfirstjórn skólans hefur fengið í fjölmiðlum, sérstaklega á fréttamiðlinum www.mbl.is. Umfjöllun um atvik sem kom upp innan veggja skólans í síðastliðinni viku, var slitin úr samhengi og sett fram á ósanngjarnan hátt.

Viðbrögð yfirstjórnar skólans í þessu máli hafa verið til fyrirmyndar og unnin í nánu samstarfi við foreldra og aðra aðila sem málið varðar. Við starfsfólk skólans höfum unnið að krafti eftir Olweusar áætluninni gegn einelti og erum að innleiða agastefnuna Uppeldi til ábyrgðar.

Við teljum að unnið sé gott starf í Grunnskólanum í Sandgerði og erum stolt af skólanum og bæjarfélaginu okkar. Við styðjum yfirstjórn skólans og höldum áfram að sinna okkar starfi af heilindum."

• 1 blogg um fréttina

Bloggað um fréttina

• Sigurður Bogi Sævarsson: Undarlegir Sandgerðingar