Verða að biðjast afsökunar
Setja bókamerki
Gylfi Arnbjörnsson, forseti ASÍ, sagði á aukaársfundi sambandsins í dag, að forsenda sáttar almennings og áhrifamanna í viðskipta- og atvinnulífi sé tvíþætt: Stjórnvöld taki á trúverðugan hátt á þeim sem báru ábyrgð á bankahruninu og þeir sem bera ábyrgðina biðji þjóðina afsökunar.
„Traust almennings á valdastofnunum og áhrifamönnum í viðskipta- og atvinnulífi er nánast horfið og sátt ekki í augsýn. Ómurinn af ásökunum Viðskiptaráðs og forstjóra stórfyrirtækjanna í garð stjórnvalda á undanförnum árum, um ofvaxinn eftirlitsliðnað, er enn í fersku minni og tillagan um arðgreiðslur hjá HB Granda bera ekki vott um breytt viðhorf.
Forsenda sáttar er að mínu mati tvíþætt. Annars vegar að stjórnvöld taki á trúverðugan og réttlátan hátt á þeim sem báru ábyrgð á hruni bankakerfisins en öll aðferðafræði við rannsókn á aðdraganda hrunsins til þessa hefur verið í skötulíki. Hins vegar verða þeir sem bera ábyrgðina að biðja þjóðina afsökunar á því að hafa komið henni í þessa stöðu," sagði Gylfi.
Gerðum ákveðin mistök
Hann sagði, að afstaða ASÍ hefði í haust verið sú, að stjórnvöld ættu að fá vinnufrið við slökkvistarfið í kjölfar bankahrunsins. Þegar í ljós kom að aðgerðir ríkisstjórnarinnar voru veikburða og handahófskenndar og þeir sem báru ábyrgð á hrunini hefðu ekki verið látnir axla hana, hefði ASÍ krafist þess að gerðar yrðu umfangsmiklar breytingar innan ríkisstjórnar, Seðlabanka og Fjármálaeftirlits.
„Engu af þessu var hrint í framkvæmd og reiðin magnaðist í samfélaginu. Um miðjan janúar var þolinmæði okkar á þrotum og miðstjórn ASÍ krafðist þess að ríkisstjórnin færi frá og að boðað yrði til kosninga. Eftir á að hyggja viðurkenni ég, að við gerðum ákveðin mistök í þessu ferli, sem rýrðu ímynd okkar og stöðu gagnvart félagsmönnnum og trúlega hefðum við átt að setja ríkisstjórninni stólinn fyrir dyrnar í byrjun desember í stað þess að bíða fram yfir áramót," sagði Gylfi.
Stóðu skógarþjófa að verki
Þetta eru ráðherrar ríkisstjórnarinnar
Funda með þingflokkum
Víkingar komnir yfir 800 milljónir í greiðslur
Stormur á Þorláksmessu en víðast hvar stefnir í hvít jól
Barn lést í árásinni
„Tímabil aukinnar eldvirkni“
Beint: Ný ríkisstjórn á Bessastöðum
