Síldin veður í höfninni

Síld hefur vaðið um Hafnarfjarðarhöfn undanfarnar vikur. Syndir síldin inn og út úr höfninni eftir eigin tiktúrum og hafa sjófarendur lóðað á mjög þykkar torfur innan hafnar sem utan.

Mikið fuglager, mávur, skarfur og aðrir sjófuglar, fylgir síldinni og er það helsta vísbendingin um að torfa sé í höfninni. Einnig fylgja hvalir síldartorfunum og koma þeir stöku sinnum inn í höfnina, en halda sig frekar utan hennar og þá sérstaklega stóru hvalirnir.

Á vef Hafnarfjarðarhafnar segir að talað sé um að fuglinn sé svo vel haldinn að hann eigi í erfiðleikum með að fljúga þegar hann hefur sporðrennt nokkrum gómsætum síldum í röð.

Ekki er talin sérstök hætta stafa af síldinni, þar sem straumar inn og út úr höfninni hreinsa hana nokkuð vel. En það er víðar sem síldin veður inn í hafnir. Vestmannaeyingar hafa undanfarið mokað upp síld í höfninni. Ekki er ljóst hvers vegna síldin veður svo víða inn í hafnir landsins, en rætt hefur verið um að ami eitthvað að, þá syndi síldin í ferskara vatn til að létta sér lífið.

Vefur Hafnarfjarðarhafnar

• 2 blogg um fréttina

Bloggað um fréttina

• Haraldur Bjarnason: Hvers vegna er hún ekki veidd?
• Jón Kristjánsson: Allir að veiða - nema við