Innlent | mbl | 7.4.2009 | 7:46 | Uppfært 9:33

Verður yfirheyrður seinna í dag

Litlu munaði að stórslys yrði þegar ökuníðingurinn reyndi að stinga lögreglu af í gærkvöldi. mbl.is/Július

Maðurinn sem flúði undan lögreglu á bifreið sinni í gærkvöldi, en var að lokum stöðvaður á leið inn í íbúahverfi á Víkurvegi, verður yfirheyrður seinna í dag en hann er nú í fangageymslum lögreglu. Mikil hætta stafaði af ökulagi mannsins en hann hlýddi ekki stöðvunarmerkjum lögreglu.

Hann ók á allt að 180 kílómetra hraða á klukkustund, þegar mest var, og ógnaði öðrum sem voru í umferðinni með aksturslagi sínu.

Eftirförin hófst á Bústaðarvegi við Grímsbæ, þegar lögreglan stöðvaði bifreiðina og hafði afskipti af ökumanni hennar, manni á þrítugsaldri. Hann sýndi mótþróa, setti aðeins rifu á bílrúðuna og neitaði að tala við lögreglu og brunaði svo af stað út Bústaðarveg niður á Reykjanesbraut.

Þar fer maðurinn yfir á rauðu ljósi og hunsar alla umferð, ekur utan í lögreglubifreið, yfir umferðareyju og snýr við. Á leiðinni aftur út Reykjanesbrautina í átt að Miklubraut ekur hann utan í tvær lögreglubifreiðar til viðbótar og bíl vegfaranda á ferð. Ók hann þá sem leið lá upp Ártúnsbrekkuna á 180 kílómetra hraða en hjá hringtorginu við Korpu gerði lögregla fyrstu tilraun til að þvinga hann út af veginum án árangurs.

Lögreglan taldi mikla hættu stafa af manninum og ekki um annað að ræða en að stöðva för hans enda munaði margsinnis aðeins hársbreidd að stórslys yrði. Þegar tókst að þvinga hann út af veginum við Víkurveg stefndi hann inn í íbúðahverfi og ekki fór á milli mála að hann hugðist ekki stöðva bílinn undir neinum kringumstæðum.

Grunur leikur á því að hann hafi verið undir áhrifum örvandi fíkniefna.