Innlent | mbl | 17.4.2009 | 13:26

Geðsjúkur maður nauðgaði 12 ára dreng

. mbl.is

Héraðsdómur Suðurlands dæmdi í morgun geðsjúkan mann til vistunar á viðeigandi stofnun. Maðurinn var sakfelldur fyrir alvarleg kynferðisbrot gegn ungum dreng á heimili sínu sumarið 2003. Geðlæknir bar fyrir dómi að maðurinn væri haldinn mjög alvarlegum og langvinnum geðsjúkdómi, hefði ekkert sjúkdómsinnsæi og borin von væri að refsing gæti borið árangur.

Maðurinn lokkaði drenginn, sem þá var 12 ára, inn í hús sitt og náði að loka hann inni í herbergi. Þar braut hann gróflega gegn drengnum en sleppti honum að því loknu. Drengurinn sagði engum frá ofbeldinu fyrr en snemma árs 2008 að hann sagði fósturföður sínum frá. Þá hafði drengurinn leiðst út í hassneyslu, haft sjálfsvígshugsanir og taldi sig vera orðinn geðveikan vegna þessa.

Ofbeldismaðurinn neitaði sök fyrir lögreglu og sagði þetta algjöran uppspuna úr drengnum. Þegar maðurinn var spurður hvort hann hefði beitt drenginn kynferðislegu ofbeldi svaraði maðurinn, „Nei, ég hef ekki haft kynmök við kvenmann í 30 ár og því síður við karlmann. Ég hef lifað heilögu lífi.“ Maðurinn kvaðst hafa verndara sem væru andaverur, gyðjur, sem hefðu gætt hans í 20 ár.

Fram kom fyrir dómi að maðurinn er greindur með geðklofasjúkdóm og hafði fengið mánaðarlega sprautur vegna sjúkdómsins, allt til ársins 2007 en þá hafi hann sagt verndargyðjurnar hafa læknað sig.

Í niðurstöðu héraðsdóms segir að fram þyki komin, svo hafið sé yfir skynsamlegan vafa, full sönnun þess að ákærði hafi framið það brot sem hann er sakaður um í ákæru. Þá segir að afar ólíklegt sé að tólf ára drengur hafi spunnið upp slíka sögu.

Í vottorði geðlæknis kom fram að erfitt væri að meta hvort alvarleg geðveiki ákærða sé af því tagi að hann hafi verið ófær um að stjórna gerðum sínum á þeim tíma sem meint brot sé talið hafa átt sér stað. Ákærði sé með mjög alvarlegan og langvinnan geðsjúkdóm, hafi ekkert sjúkdómsinnsæi og það sé borin von að refsing geti borið árangur ef sök sannist á hann.

Dómurinn taldi að ekki lægi fyrir að maðurinn hafi verið ósakhæfur þegar hann framdi brot sitt. Hins vegar féllst dómurinn á það mat geðlæknisins að borin von sé að refsing í tilviki ákærða muni bera árangur og verði hann því dæmdur til að sæta vistun á viðeigandi stofnun.

Drengurinn fór fram á fimm milljónir króna í skaðbætur en dómurinn dæmdi honum 1.500 þúsund krónur í skaðabætur, auk vaxta frá þeim degi sem brotið var framið, 12. júlí 2003.

Dómur héraðsdóms Suðurlands