Magn fíkniefnanna liggur ekki fyrir

Lögreglan hefur lagt hald á slönguhraðbát sem þrír menn komu með til Djúpavogs fyrir nokkrum dögum og notuðu við fíkniefnasmygl. Lögreglan stöðvaði einn þremenninganna í nótt á hringveginum, rétt við afleggjarann að Höfn. Hann var á suðurleið með fíkniefnin í jeppa, samkvæmt heimildum mbl.is.

Nákvæmar upplýsingar um magn fíkniefnanna sem lagt var hald á liggja líklega ekki fyrir fyrr en á morgun, samkvæmt upplýsingum lögreglunnar. 

Mennirnir munu hafa sagt fólki á Djúpavogi að þeir hafi keypt bátinn af banka nýverið. Þeir sögðust vera áhugamenn um köfun og ætla að stunda köfun í nágrenninu. Aldrei sáust þó köfunarbúningar nálægt bátnum en athygli vakti að um borð voru nokkrir stórir bensínbrúsar líkt og löng sigling væri fyrir höndum. 

Slöngubáturinn er knúinn aflmikilli utanborðsvél og því hraðskreiður. AS

• 2 blogg um fréttina

Bloggað um fréttina

• S Kristján Ingimarsson: Ja hérna
• Frikkinn: Fattlausir fíkniefnasmyglarar