Innlent | mbl | 28.4.2009 | 20:59

Skylt að sækja um ESB-aðild

Ungir jafnaðarmenn segja Samfylkingunni skylt að sækja um ESB-aðild.

„Stjórnmálaflokkar sem vilja skoða nánara samstarf við Evrópu og stefna að upptöku evru eru í meirihluta. Samfylkingunni ber því skylda til að tryggja að Ísland sæki um aðild sem fyrst og leggja samninginn í dóm þjóðarinnar. Að öðrum kosti fari hún ekki í ríkisstjórn,“ segja Ungir jafnaðarmenn.

Þeir sendu frá sér eftirfarandi ályktun varðandi stjórnarmyndunarviðræður Samfylkingar og Vinstri grænna:

„Ungir jafnaðarmenn fagna sigri jafnaðarstefnunnar í nýafstöðnum kosningum. Nú er hægt að mynda raunverulega félagshyggju og velferðarstjórn. Samfylkingin er stærsti flokkur landsins og kemur hún til með að leika lykilhlutverk við uppbyggingu ásamt þeim fjölda þingmanna sem vilja fara í aðildarviðræður við Evrópusambandið. Skipan kvenna á þing er sérstaklega ánægjuleg enda hefur barátta fyrir kvenfrelsi og samningum við Evrópusambandið verið sérstaða Samfylkingarinnar í íslenskum stjórnmálum.

Stærsta vandamál Íslands í dag er gjaldþrota peningamálastefna. Hún bætist ofan á alþjóðlega bankakreppu sem gerir það að verkum að enn brýnna er að leysa vanda íslensku krónunnar. Besta lausnin er að taka upp evru með stuðningi frá Evrópska seðlabankanum. Til þess að það sé mögulegt þurfum við að ganga í Evrópusambandið með öllum þeim kostum og göllum sem því fylgja. Ungir jafnaðarmenn telja að kostirnir vegi miklu þyngra.

Úrslit kosninganna tala sínu máli. Stjórnmálaflokkar sem vilja skoða nánara samstarf við Evrópu og stefna að upptöku evru eru í meirihluta. Samfylkingunni ber því skylda til að tryggja að Ísland sæki um aðild sem fyrst og leggja samninginn í dóm þjóðarinnar. Að öðrum kosti fari hún ekki í ríkisstjórn. Þannig tekur hún málið úr höndum þingsins og færir í hendur þjóðarinnar.

Ungir jafnaðarmenn vilja að Samfylkingin og Vinstri græn myndi nýja ríkisstjórn. Til að svo megi verða þurfa flokkarnir að færa valdið til þjóðarinnar. Þjóðin á að ákveða hvort hún vilji upptöku evru og hvort hún gangi í Evrópusambandið að undangengnum samningaviðræðum.“