Fæddi barnið í framsætinu

Klukkan tíu í gærkvöld  fæddist lítil stúlka í framsætinu á Ford Explorer á bílaplani við Slökkvistöðina í Árbæ. Þrír vaskir sjúkraflutningamenn tóku á móti.

Móðirin, Hanna Kristín Björnsdóttir var á leið á Landspítalann úr Árbæ þegar hún missti legvatnið en augnabliki síðar skaust kollurinn á barninu út.  Föðurnum, Hrafni Varmdal hætti að lítast á blikuna og sneri við og keyrði að slökkvistöðinni í Árbæ eftir að hafa hringt í Neyðarlínuna.

Hann segist hafa sagt við konuna sína að nú væri þessi draumur orðinn nógu langur. Hann væri til í að vakna.  Þegar á slökkvistöðina var komið var fæðingin komin langt á veg. Ekki gafst neitt ráðrúm til að flytja móðurina í sjúkrabíl. Barnið fæddist í framsæti Ford Explorer jeppabifreiðar foreldranna augnabliki eftir að bíllinn renndi í hlað og þrír menn úr slökkviliðinu tóku á móti.

Áhugasamur kaupandi Ford Explorer bifreiðar sem skoðaði bifreiðina um sex leytið í gær með kaup í huga  kann að skoða sig um hönd þegar hann fær að vita að bílnum hafi verið breytt í fæðingardeild nokkrum klukkustundum síðar. Faðirinn eyddi drjúgum hluta af nóttinni í að skrúbba bílinn en ekki er víst að það dugi til. Hann var heldur ekki viss um að hann tímdi að láta bílinn af hendi eftir atburði gærkvöldsins.

• 2 blogg um fréttina

Bloggað um fréttina

• Atli Sigurjónsson: Vá hver hefur ekki fætt barn í bíl...
• Hvíti Riddarinn: Stúlkan heppin að vera ekki á Yaris