Úrkomumet féllu á mörgum veðurathugunarstöðvum

Veðurstofan hefur nú staðfest að nokkur úrkomumet féllu í nýliðnum apríl, sem var mikill rigningarmánuður víða á Suðurlandi og einnig vestan til á Norðurlandi.

Nokkur mánaðarúrkomumet féllu. Á Kvískerjum mældust 523,7 millimetrar og hefur ekki mælst meiri úrkoma á íslenskri veðurstöð í apríl. Eldra met var sett á Kvískerjum í apríl 1984, en þá varð heildarúrkoman 520,7 mm. Aprílúrkomumet voru sett á fleiri stöðvum.

Þeirra merkust eru að mati Trausta Jónssonar veðurfræðings nýtt met í Vestmannaeyjum, en þar hefur verið mælt frá 1881, og á Eyrarbakka þar sem einnig hefur verið mælt frá 1881, en með nokkrum hléum. Met var sett í Vík í Mýrdal (mælt frá 1926) og á mörgum stöðvum á vestanverðu Norðurlandi. Úrkoma í Reykjavík mældist 100 mm sem er 70% umfram meðallag, á Akureyri mældist úrkoman 27 mm, 20% undir meðallagi.

Apríl reyndist mjög hlýr. Meðalhiti í Reykjavík var 5,0 stig eða 2,1 stigi ofan meðallags. Þetta er tíundi hlýjasti apríl frá upphafi samfelldra mælinga 1870. Á Akureyri var meðalhitinn 3,5 stig, 1,9 stigum ofan meðallags. Á Höfn í Hornafirði var meðalhitinn 5,7 stig og er það 2,9 stigum yfir meðallagi.

Nánar er fjallað um málið í Morgunblaðinu í dag.