Einkafundir í viðskiptanefnd?

Þingmenn stjórnarandstöðunnar vildu fá að vita um það á Alþingi í dag hvort haldnir væru einkafundir stjórnarliða í viðskiptanefnd þingsins. Tilefnið var ummæli varaformanns nefndarinnar í útvarpsviðtali í morgun um að mikið væri að gera í nefndinni.

Eygló Harðardóttir, þingmaður Framsóknarflokks, sagðist hafa hlustað á morgunþátt Bylgjunnar í morgun, þar sem Magnús Orri Schram, varaformaður viðskiptanefndar, hefði sagt að mikið annríki væri í nefndinni.

Þetta sagði Eygló einkennilegt í ljósi þess að enginn fundur hefði verið haldinn í nefndinni í síðustu viku. Til hefði staðið að halda fund en hann féll niður. Spurði Eygló hvort það væru ný vinnubrögð að halda fundi í nefndinni án þess að stjórnarandstaðan vissi af því.

Magnús Orri Schram, þingmaður Samfylkingarinnar og varaformaður viðskiptanefndar, sagði að vera mætti að hann hefði  ekki verið nákvæmur í orðum sínum í beinni útsendingu í morgun. Hann sagðist hins vegar hafa verið á fullu við að lesa sér til um þau mál, sem ættu eftir að koma til kasta nefndarinnar í sumar.

• 3 blogg um fréttina

Bloggað um fréttina

• Jakob Falur Kristinsson: Viðskiptanefnd
• Andrés Magnússon: Nefndin, það er ég!
• Einar B Bragason : Furðufundir ( lesfundir ) í viðskiptanefnd?