Karlar í meirihluta í borgarráði

Sex karlar og ein kona sitja í borgarráði Reykjavíkur en kosið var í borgarráð í upphafi borgarstjórnarfundar í dag.

Af hálfu Sjálfstæðisflokks voru  Vilhjálmur Þ. Vilhjálmsson, Júlíus Vífill Ingvarsson og Kjartan Magnússon kjörnir í borgarráð og af hálfu Framsóknarflokks var Óskar Bergsson kjörinn en hann er jafnframt formaður ráðsins.

Dagur B. Eggertsson og Björk Vilhelmsdóttir voru kjörin í borgarráð fyrir hönd Samfylkingarinnar og Þorleifur Gunnlaugsson af hálfu Vinstrihreyfingarinnar-græns framboðs. Hann kemur í stað Svandísar Svavarsdóttur og er sá eini sem kemur nýr inn í ráðið.  

Björk kvaddi sér hljóðs og vakti athygli á kosningunni og óeðlilegum kynjahlutföllum. Skoraði hún jafnframt á meirihlutann að ráða bót á málinu.

Vilhjálmur Þ. Vilhjálmsson, var endurkjörinn forseti borgarstjórnar. Dagur B. Eggertsson var kjörinn 1. varaforseti og  Kjartan Magnússon, borgarfulltrúi Sjálfstæðisflokksins var kjörinn 2. varaforseti.

• 1 blogg um fréttina

Bloggað um fréttina

• Dofri Hermannsson: Karlar allsráðandi