„Fullkomin óvissa um Icesave-samninginn"

Einar K. Guðfinnsson, þingmaður Sjálfstæðisflokks, segir á heimasíðu sinni í dag að staða Icesave-samningsins við Breta og Hollendinga sé mun alvarlegri en nokkurn gat órað fyrir. Fullkomin óvissa virðist ríkja um hvort samningurinn verði yfir höfuð staðfestur á Alþingi.

Einar sagði á heimasíðu sinni í gær, að engin vafi léki á að samningurinn hlyti staðfestingu þings og forseta Íslands. Segist hann bókstaflega hafa gengið út frá því, að forystumenn ríkisstjórnarflokkanna hefðu gengið úr skugga um það að samningurinn nyti stuðnings meirihluta Alþingis áður en hann var undirritaður.

Nú sé það fullkomlega óvíst. „Ég spurði nefnilega Guðfríði Lilju Grétarsdóttur, formann þingsflokks Vinstrihreyfingarinnar græns framboðs í gær á Alþingi um þetta í gær á Alþingi. Svarið var áhugavert. Meirihluti þingflokksins styður málið. Ekkert um það hvort málið nyti nægjanlegs stuðnings á Alþingi. Því hefur enn ekki verið svarað.

Þessi stóri samningur; fjárskuldbinding um heila 650 milljarða er í hífandi óvissu. Það liggur ekki fyrir hvort ríkisstjórnin geti fullnustað samning sem hún hefur gert.

Það dugir auðvitað ekki að vísa til þess að málið sé í höndum Alþingis að lokum. Málið var unnið á forræði ríkisstjórnarinnar og er á hennar ábyrgð. Samninganefndin var skipuð af ráðherrunum. Stjórnarandstaðan var ekki kölluð til. Eftir hennar stuðningi hefur ekki verið leitað.

Gleymum því ekki að það er búið að undirskrifa samninginn. Í svona máli ber ríkisstjórn að ganga úr skugga um stuðning við hann. Það er forkastanlegt að ekki sé full vissa um stöðu málsins; máls af þessari stærðargráðu. Hér er enn eitt málið á ferðinni þar sem ríkisstjórnin er á furðulegri ferð," segir Einar.

Fram kom á mbl.is í gær, að Guðfríður Lilja, Lilja Mósesdóttir og Ögmundur Jónasson greiddu atkvæði gegn því á þingflokksfundi VG á föstudag, að ríkisstjórnin fengi umboð til að ganga frá Icesave-samningunum eins og þeir lágu þá fyrir.

Heimasíða Einars K. Guðfinnssonar

• 2 blogg um fréttina

Bloggað um fréttina

• Magnús Helgi Björgvinsson: Gætt að þvi hvað þú gerir maður!
• Jón Ingi Cæsarsson: Sjálfstæðismenn hljóta að samþykkja Icesave.?