9 ára fangelsi fyrir fíkniefnasmygl

Hæstirétt­ur hef­ur dæmt 48 ára gaml­an karl­mann, Þor­stein Kragh, í níu ára fang­elsi fyr­ir inn­flutn­ing á 192 kíló­um af kanna­bis­efn­um og 1,3 kíló­um af kókaíni á ár­inu 2008, í þeim til­gangi að dreifa efn­un­um og selja þau.

Ásamt Þor­steini var Jacob Van Hinte, 71 árs gam­all Hol­lend­ing­ur, dæmd­ur í sjö og hálfs árs fang­elsi. Frá fang­els­is­dómn­um dregst gæslu­v­arðhald mann­anna, sem báðir hafa setið í varðhaldi í ár.

Efn­in fund­ust við komu farþega­ferj­unn­ar Nor­rænu til Seyðis­fjarðar þriðju­dag­inn 10. júní 2008, falið í sér­út­bún­um geymslu­hólf­um í hús­bif­reið af gerðinni Iveco. Sam­kvæmt dómn­um telst sannað að á fyrri hluta árs­ins 2008 lögðu Þor­steinn Kragh og Jacob Van Hinte á ráðin um flutn­ing efn­anna frá Hollandi til Íslands og hitt­ust þeir í því skyni í Hollandi auk þess að vera í síma­sam­bandi.

Þor­steinn annaðist fjár­mögn­un og kaup fíkni­efn­anna og hugðist taka á móti þeim á Íslandi en Jacob tók við efn­un­um í Hollandi og flutti þau þaðan í bíln­um land­leiðina til Dan­merk­ur og þaðan með ferj­unni til Íslands.

Fram kem­ur m.a. í dómi Hæsta­rétt­ar, að Jacob hafi árið 2005 verið dæmd­ur í 3 ára og 9 mánaða fang­elsi í Alican­te á Spáni fyr­ir inn­flutn­ing á miklu magni fíkni­efna til Spán­ar.  

Aðfinnslu­verð vinnu­brögð lög­reglu

Hæstirétt­ur féllst ekki á kröfu Þor­steins um frá­vís­un máls­ins á grund­velli þess að hann hefði í fjöl­mörg skipti ekki fengið gögn af­hent eða fengið þau of seint meðan á lög­reglu­rann­sókn stóð.

Hæstirétt­ur seg­ir, að Þor­steinn hafi ekki haldið því fram að vörn hafi verið áfátt vegna þessa drátt­ar á af­hend­ingu rann­sókn­ar­gagna og sé ekki fall­ist á með hon­um að vísa beri mál­inu frá  af þess­um sök­um. Hins veg­ar tek­ur Hæstirétt­ur und­ir það með héraðsdómi að þessi vinnu­brögð lög­reglu séu aðfinnslu­verð.

Dóm­ur Hæsta­rétt­ar

• 1 blogg um frétt­ina

Bloggað um frétt­ina

• Pálmi Freyr Óskars­son: Er þetta ein­hvað grín.......