Innlent | Bæjarins besta | 12.6.2009 | 8:00

Óánægja með að enginn sjómaður skyldi heiðraður

Enginn sjómaður var heiðraður á sjómannadaginn um síðustu helgi á Ísafirði. mynd/bb.is

Mikið hefur borið á óánægju meðal Ísfirðinga með það að enginn sjómaður hafi verið heiðraður á sjómannadaginn líkt og hefur verið um áratuga skeið. Mikil hefð er fyrir sjósókn hér fyrir vestan og Ísfirðingar voru einmitt fyrsti bærinn, ásamt Reykjavíkurborg, til að halda sjómannadaginn hátíðlegan árið 1938.

„Það var bara ekki nokkur maður í holunum til þess að veita þessari viðurkenningu viðtöku, “ segir Sævar Gestsson, formaður sjómannadeildar Verkalýðsfélags Vestfirðinga.

„Þeir fáu sjómenn sem voru inni í myndinni höfðu ekki áhuga fyrir því. Það er auðvitað miðað við vissan aldur, að menn séu komnir á eftirlaun. Þeir eru nú ekki margir nú til dags.“

Um 120 sjómenn á Ísafirði eru skráðir í félagið en haft var samband við a.m.k. tvo sem höfðu aldur til um hvort þeir væru reiðubúnir til að vera heiðraðir um Sjómannadagshelgina, svo reyndist ekki. „Maður heyrði þá afsökun að þeir hefðu ekki verið nóg til sjós og einnig að þeir væru ekki nógu gamlir. Það er ekkert hægt að gera ef menn hafa ekki áhuga fyrir þessu, það er ekki hægt að skikka neinn til þess“, segir Sævar.

Sjómannadagurinn hefur verið haldinn á hverju ári frá árinu 1938, en að sögn Sævars hefur komið fyrir að enginn sjómaður hafi verið heiðraður og nokkur ár hafi dottið út. „Það eru bara orðnir svo fáir sem eru í pottinum. Það voru mest 200-300 sjómenn skráðir í félagið þegar það var kraftur í útgerð hérna á Ísafirði, þetta er orðið miklu minna núna“, segir Sævar.

Hann viðurkennir að þetta sé leiðinlegt ástand og skilur að fólki þyki það miður að enginn á Ísafirði hafi verið heiðraður í ár. „Svona er lífið í þessu, það er ekkert við þessu að gera. Þegar sjómönnum fækkar þá eru færri menn í spilunum til að heiðra.“, segir Sævar.