Heildarmyndin ekki komin

Í frumvarpi fjármálaráðherra um ráðstafanir í ríkisfjármálum sem dreift var á Alþingi í kvöld kemur fram að virðisaukaskattur á ýmsar neysluvörur sem lækkuðu um 7% hækki á ný upp í 24,5%. Gylfi Arnbjörnsson forseti ASÍ sagði við mbl.is að við þetta myndi vísitala neysluverðs hækka um 0,25%.

„Þetta er þessi svokallaði sykurskattur sem þarna er verið að tala um," sagði Gylfi en hann fékk stutta kynningu á frumvarpinu í dag hjá formanni fjárlaganefndar alþingis.

„Heildarpakkinn ekki kominn"
Um hækkanir á álögum og niðurskurð ríkisins í framkvæmdum sagði Gylfi: „Heildarpakkinn er ennþá ekki kominn fram og því er erfitt að hafa skoðun á einstaka liðum þegar við vitum ekki hvaða áform ríkisstjórnin hefur í þessum efnum 2010, 2011, 2012 og 2013 og þar fram eftir götunum."

„Við höfum auðvitað miklar áhyggjur af því hvað á að ganga langt í skattahækkunum 2011. Það er líka erfitt að skoða niðurskurð til framkvæmda í þessu frumvarpi án þess að geta skoðað það í samhengi við það hvaða aðrar framkvæmdir verða þá hugsanlega settar í gang sem hægt væri að fjármagna utan ríkisreiknings."

Gylfi sagðist eiga von á fyllri skýrslu um frumvarpið á næstu dögum. „En eins og er þetta ekki það upplag sem við getum byggt okkar starf á. Það þarf að vera mun skýrara hver áform ríkisstjórnarinnar eru inn í framtíðina og ef það á að gagnast eitthvað til breytinga á hagstöðu seðlabankans svo ég taki dæmi, þá þarf það að koma fram." sagði Gylfi og bætti því við að það væri mjög þröng staða í framkvæmdageiranum og lagði áherslu á að það væri ámælisvert að fara í harðan niðurskurð þar með tillit til þess atvinnuleysis sem nú ríkir í þeim atvinnugreinum.

„Það er bara mjög mikilvægt að halda framkvæmdastiginu uppi, að öðrum kosti falla tekjustofnar ríkisins saman," sagði Gylfi að lokum.

• 1 blogg um fréttina

Bloggað um fréttina

• Sigurjón Þórðarson: Velferðarmaðkur Samfylkingarinnar kominn fram