Innlent | mbl | 20.6.2009 | 18:39

Losun gróðurhúsalofttegunda jókst um 6%

Losun gróðurhúsalofttegunda hefur aukist um 72% frá 1990, en þó enn meira frá vegasamgöngum eða um 81%.

Losun gróðurhúsalofttegunda jókst um 6% á árinu 2007. Munar þar mest um aukið útstreymi frá áliðnaði, en árið 2007 var gangsett nýtt álver á Reyðarfirði auk þess sem framleiðsluaukning varð hjá Norðuráli á Grundartanga. Þetta kemur fram í skýrslu Umhverfisstofnunar um losun gróðurhúsalofttegunda árið 2007.

Árið 1990 nam útstreymi gróðurhúsalofttegunda 3,4 milljónir tonna CO₂-ígilda. Frá 1990 til 2007 jókst útstreymi um 32%. Mest hefur útstreymi aukist frá vegasamgöngum (81%) og áliðnaði (72%). Talsverð aukning hefur einnig verið vegna meðhöndlunar úrgangs sem og vegna rafmagns- og hitaframleiðslu. Útstreymi hefur hins vegar dregist saman um 18% í sjávarútvegi og um 7% í landbúnaði.

Árið 2007 var losunin 4,5 milljónir tonna CO₂ - ígilda og jókst um 6% milli ára. Ísland hefur skuldbundið sig til þess að halda sig innan tiltekinna marka varðandi losun gróðurhúsalofttegunda. Samkvæmt spám Umhverfisstofnunar mun Ísland standa við sínar skuldbindingar gagnvart Kyoto-bókuninni en mikilvægt sé hins vegar að allir leggist á eitt til að svo þetta megi takast.

Á fyrsta skuldbindingartímabili Kyoto-bókunarinnar frá 2008 til 2012 nema losunarheimildir Íslands rúmlega 18,5 milljónum tonna CO₂-ígilda. Þetta jafngildir því að árleg losun skuli að meðaltali nema um 3,7 milljónum tonna. Samkvæmt íslenska ákvæðinu (14/CP.7 við Kyoto-bókunina) er Íslandi þó heimilt að halda losun frá nýrri stóriðju eða stækkun stóriðjuvera utan við losunarskuldbindingar sínar eftir að losunarheimildir hafa verið fullnýttar, samkvæmt tilteknum reglum. Heildarmagnið sem halda má utan við losunarheimildirnar nemur samtals 8 milljónum tonna á fyrsta skuldbindingartímabilinu, eða að meðaltali 1,6 milljónum tonna á ári. Sérstakar reglur gilda um hvaða losun falli undir íslenska ákvæðið. Einnig er mögulegt að kaupa heimildir á kolefnismörkuðum og að fá úthlutað sérstökum heimildum vegna þátttöku í verkefnum á sviði loftslagsvænnar þróunaraðstoðar og/eða vegna bindingar kolefnis með landgræðslu og skógrækt.