„Stemmningin var góð“

Nokkur hundruð manns komu saman á Austurvelli til að taka þátt í mótmælaaðgerðum sem skipulögð voru af Röddum fólksins. Nokkrir mótmælenda kveiktu í flugeldatertu, með tilheyrandi sprengingum, en að öðru leyti hefur allt gengið friðsamlega fyrir sig að sögn lögreglu.

Forsvarsmenn Radda fólksins og lögreglan voru ekki sammála um hversu margir hefðu verið á Austurvelli. Lögreglan sagði um 100 en hjá Röddum fólksins fengust þær upplýsingar að um 1000 manns hefðu verið á svæðinu. Aðrir sem voru á svæðinu, sem mbl.is ræddi við, sögðu að líklega hefðu nokkur hundruð manns verið á svæðinu þegar mest var.

„Þetta gekk skínandi vel og stemmningin var góð,“ sagði Hörður Torfa, forsprakki Radda fólksins. Annar mótmælafundur var boðaður á laugardaginn eftir viku. „Það getur samt vel verið að blásið verði til fundar í miðri næstu viku. Það mikil undiralda í þjóðfélaginu vegna stöðu heimilanna. Stóra spurningin er; hvenær á að gera eitthvað fyrir þau?“ sagði Hörður í samtali við mbl.is.

Andrea Ólafsdóttir frá hagsmunasamtökum heimilanna og Jóhannes Þ. Skúlason, sagnfræðingur og grunnskólakennari, fluttu ræður, m.a. um Icesave-skuldbindingar og stöðu heimila og fyrirtækja. Mótmælendur kröfðust þess að útrásarvíkingar og auðjöfrar, sem stofnað hefðu til skulda sem þjóðin sæti nú uppi með, myndu svara til saka.