Beðið eftir gögnum frá stjórninni

Vilhjálmur Egilsson, framkvæmdastjóri Samtaka atvinnulífsins, segir að  samningaviðræður um svonefndan stöðugleikasáttmála mjakist áfram en að hann þori ekki að vera jafn bjartsýnn og forsvarsmenn BSRB sem greini frá því á heimasíðu samtakanna að stefnt sé að því að ganga frá samkomulagi í dag.

Vilhjálmur segir að enn sé beðið eftir því að ríkisstjórnin leggi fram gögn sem hún hafi ætlað að leggja fram í dag. Til hafi staðið að þau yrðu lögð fram á fundi klukkan hálf tólf en að það hafi dregist. Enn sé unnið að því að ganga frá gögnunum og vonast sé til þess að þau verði lögð fram síðar í dag. Á meðan beðið sé vinni menn að öðrum málum.

„Við reynum að klára það sem við getum á meðan við bíðum," sagði Vilhjálmur er blaðamaður mbl.is ræddi við hann í dag. „En það er ekkert í höfn fyrr en það er allt í höfn.”

• 1 blogg um fréttina

Bloggað um fréttina

• Jón Rúnar Ipsen: Niðurstaðan