Undirritað ef sátt næst

„Forseti ASÍ og framkvæmdastjóri SA slitu viðræðunum fyrir okkar hönd í beinni útsendingu sem hlýtur að vera einsdæmi í sögunni," sagði Eiríkur Jónsson formaður Kennarasambands Íslands í samtali við mbl.is fyrir skömmu.

 „Ég hlustaði á það í bílnum fyrir utan stjórnarráðið að það væri búið að slíta viðræðunum og svo var viðtal við þá," sagði Eiríkur. „Vegna þess að við vorum ekki sammála þeim um eitt atriði þá ákváðu þeir að við værum búnir að slíta. Ég hélt alltaf að við stæðum í samningaviðræðum við ríkisstjórnina og sveitafélögin fyrst og fremst en ekki Alþýðusambandið," sagði Eiríkur.

Skjalið sem gæti orðið grunnur að sátt

 Eiríkur sagði að á fundinum í forsætisráðuneytinu sem hófst klukkan sjö í kvöld hefði forsætisráðherra lagt fram skjal sem „eitthvað væri búið að fikta í" og taldi hann að það gæti orðið grunnur að sátt í þessu máli. 

„Nú standa málin þannig að við erum búin að boða stjórnarfund í fyrramálið, BHM er búið að boða miðstjórn til fundar í fyrramálið  og BSRB er búið að boða fund í fyrramálið í sínu baklandi þar sem við munum kynna þetta plagg sem forsætisráðherra lagði fram og við munum síðan taka afstöðu til þess. Þannig að það verður náttúrulega ekkert undirritað nema um það verði sátt."sagði Eiríkur að lokum.

• 5 blogg um fréttina

Bloggað um fréttina

• Sigurður Ingi Jóhannsson: Vandræðagangur
• Björn Heiðdal: Samfylkingin gubbar yfir þjóðina.
• Einar Guðjónsson: Gefst ekki upp fyrir Handrukkaragenginu
• Páll Vilhjálmsson: Sátt um þjóðargjaldþrot, nei takk
• Jóna Kolbrún Garðarsdóttir: Gagnslaus verkalýðsforusta.