Umferðin hefur gengið mjög vel

Mjög mikil umferð var út úr höfuðborginni í dag og raunar víða um land og gekk ágætlega, að sögn Árna Friðleifssonar, varðstjóra umferðardeildar lögreglunnar á höfuðborgarsvæðinu. Umferð gekk afar hægt á tímabili á Kjalarnesinu, í grennd við Hvalfjarðargöngin en nú undir kvöld dró úr mesta þunganum.

Bílalestin var löng í báðar áttir út úr borginni í dag en þó voru sýnu fleiri á leiðinni norður, að sögn Árna.

Lögreglumenn könnuðu ástand ökutækja og sagði Árni það mjög gott hjá langflestum. „Framlengingu á speglana vantaði hjá einum og einum sem var með hjólhýsi og ljósabúnaður var sums staðar í ólagi, en heilt yfir var ástandið mjög gott.“

Árni segir stundum myndast töluverðar raðir á eftir ökumönnum með fellihýsi eða hjólhýsi í eftirdragi. Hámarkshraði þeirra sé 80 km á klukkustund en önnur ökutæki mega fara á 90 km hraða. „Við beinum því til þeirra sem mega ekki fara hraðar en 80 að taka fullt tillit til annarra ökukmanna og víkja fyrir þeim.“

• 1 blogg um fréttina

Bloggað um fréttina

• Ómar Ragnarsson: Tilfinningaríkur íslenskur skapsmunaakstur.