Innlent | mbl | 22.7.2009 | 21:09 | Uppfært 22:47

Daily Telegraph fjallar um reiði Íslendinga

Steingrímur J. Sigfússon fjármálaráðherra. mbl.is/Árni Sæberg

Greint er frá því í breska blaðinu Daily Telegraph að Steingrímur J. Sigfússon, fjármálaráðherra Íslendinga, sé líkt og margir Íslendingar, enn mjög ósáttur við það bresk yfirvöld skuldi hafa beitt hryðjuverkalögum gegn Íslendingum í kjölfar bankahrunsins á Íslandi.

Í grein blaðsins segir að Steingrímur segi aðgerðir breskra yfirvalda fáránlegar og að hann telji þær hafa tafið fyrir því að samkomulag næðist um endurgreiðslur vegna trygginga á Icesave innlánum í Bretlandi.

„Að beita hryðjuverkalögum til að frysta íslenskar eignir er langt handan við allt það sem er ásættanlegt og það hefur skapað mjög slæmt andrúmsloft,” segir hann í viðtali við blaðið. Þá segir hann Íslendinga eiga enn erfitt með að skilja að Brestum skuli hafafundist þeir eiga heima á lista með al-Qaeda hryðjuverkasamtökunum. Hann telji þó að finna verði leiðir til að leysa Icesave-málið á siðmenntaðan hátt.

Steingrímur segir einnig í viðtalinu að hann telji það siðferðislegt hlutverk sitt að binda endahnút á tíu ára ráns- og ævintýraferð frjálsrar markaðshyggju. „Við munum alfarið snúa baki við slíkri hamfarastefnu og færa landið aftur í sinn rétta farveg sem norrænt velferðasamfélag, með sterku félagslegu kerfi og endurskiptingu auðs,” segir hann.

Einnig er rætt við rithöfundinn Einar Má Guðmundsson, í grein Daily Telegraph sem segir framkomu breskra yfirvalda hafa verið mjög særandi. „Við höfum alltaf verið góðir bandamenn. Við misstum hlutfallslega fleiri sjómenn við það að flytja þorsk til Englands í stríðinu en þið misstuð á stríðsvellinum.” segir hann.

„Þetta sannar það sem sósíalistar hafa alltaf sagt, að í heimi kapítalismans eru engir vinir. Ég hef samúð með breskum almenningi sem í einfeldni sinni treysti Landsbankanum en ég hafði aldrei heyrt um Icesave áður en þetta gerðist. Okkur var sagt að það sem bankarnir gerðu í útlöndum tengdist okkur ekki neitt en þegar allt fór í vitleysu þá féll ábyrgðin á okkur. Það er ástæðan fyrir því að við höfum á tilfinningunni að þetta sé ekki réttlátt.”

Einnig kemur fram í greininni að íslenskir embættismenn séu Bretum reiðir fyrir að tengja saman lausn Icesave-deilunnar og lán Alþjóðagjaldeyrissjóðsins til Íslendinga. Er haft eftir einum þeirra að Bretar komi enn fram af átjándu aldar yfirgangi.