Öflugt eftirlit um helgina

Lögreglan verður með öflugt eftirlit um verslunarmannahelgina. Fram kemur á vef lögreglunnar að ríkislögreglustjóri veiti lögregluembættum landsins sem fyrr stuðning á sviði umferðar- og fíkniefnamála, og við almenna löggæslu í bæjarfélögum og á skipulögðum útihátíðum.  

Fíkniefnalöggæsla:

Frá 30. júlí og fram yfir verslunarmannahelgina verða á vegum ríkislögreglustjóra tvö teymi fíkniefnalögreglumanna og tollvarða með fíkniefnaleitarhunda og sinna fíkniefnalöggæslu. Þau ferðast um landið og verða á þeim stöðum sem þörf er talin á.  

Lögreglustjórar halda jafnframt sjálfir úti fíkniefnaeftirliti í umdæmum sínum, m.a. með fíkniefnaleitarhundum lögregluembættanna, embættis Tollstjóra og Fangelsismálastofnunar.

Umferðareftirlit:

Á grundvelli samstarfssamnings ríkislögreglustjóra og Landhelgisgæslunnar verður þjóðvega- og hálendiseftirliti sinnt úr þyrlu Landhelgisgæslunnar auk þess sem ríkislögreglustjóri leggur til lögreglubifreið til umferðareftirlits á Suður- og Vesturlandsvegi.

Lögreglan mun leggja sérstaka áherslu á hraðamælingar, sýnilegt eftirlit á hættulegum vegarköflum og á þeim svæðum sem talið er að mestur fólksfjöldi verði á.  Einnig verður lögð áhersla á eftirlit með akstri undir áhrifum áfengis og vímuefna.

Almenn löggæsla:

Sérsveit ríkislögreglustjóra veitir lögreglustjórum aðstoð við almenna löggæslu á bæjarhátíðum, útihátíðum og á höfuðborgarsvæðinu. Þá verður einnig haldið úti hreyfanlegu almennu eftirlit, eftir þörfum hverju sinni.

• 2 blogg um fréttina

Bloggað um fréttina

• Eiður Svanberg Guðnason: Einfalt mál
• Haraldur Haraldsson: Öflugt eftirlit um helgina/ engin mótmælir þvi,og haga sé vel!!!!!