Innlent | mbl | 12.8.2009 | 16:23 | Uppfært 17:03

Enginn hafnaði láni Rússa

Seðlabankinn mbl.is/Ómar

Engum sem mbl.is hefur rætt við úr íslenska stjórnkerfinu er kunnugt um að Íslendingar hafi afþakkað fjögurra milljarða evra lán frá Rússum í október, eins og sendiherra Rússa á Íslandi fullyrti í dag. Þeirra á meðal er Jón Sigurðsson, formaður samninganefndar íslenska ríkisins um gjaldeyrislán.

Í viðtali við Netvarpið í dag vísar sendiherrann, Victor I. Tatarintsev, til þáverandi ríkisstjórnar, en Jón bendir á að viðræður um gjaldeyrislán hafi ekki verið í hans höndum á þeim tíma. Nefndarmönnum í samninganefndinni sem nú situr var þó engin höfnun kunngjörð.

Þann 7. október síðastliðinn birti Seðlabanki Íslands fréttatilkynningu þess efnis að 4 milljarða evra lánið væri í höfn, og var það haft eftir sendiherranum. Síðar þann sama dag var áréttað að lánveiting væri enn á viðræðustigi. Það var ennfremur haft eftir Davíð Oddssyni, þáverandi Seðlabankastjóra, á fréttavef Bloomberg. Þar sagði hann ennfremur að hvers kyns aðstoð frá Rússum yrði vel þegin.

Í rússneskum fjölmiðlum kemur fram þann sama dag, 7. október, að Rússum hafi borist beiðni um lánveitingu frá íslenskum stjórnvöldum.

Íslensk sendinefnd fundaði með Dimitry Pankin, aðstoðarfjármálaráðherra Rússa, í Moskvu viku síðar. Í kjölfarið birtist tilkynning á vef Seðlabankans, þann 15. október, en þar var hvergi minnst á neinar upphæðir eða framvindu lánasamninga. Í tilkynningunni segir m.a.:

Dimitry Pankin sagði eftir fundina: „Fundirnir voru mjög vinsamlegir og við höfum fræðst mikið um stöðu Íslands, bankakerfi landsins og íslenska hagkerfið. Við munum fara ofan í saumana á málunum áður en við tökum lokaákvörðun.“

Í viðtali við rússnesku fréttastofuna Prime Tass þann 28. október segir Pankin að lánveiting til Íslands hafi í upphafi ekki verið hugsuð sem aðstoð vegna fjárhagsaðstæðna hér á landi. Frekar hafi verið talið að lánið væri góður fjárfestingarkostur. Á þessum tíma, þegar viðtalið er tekið, hafi aðstæður á Íslandi breyst gríðarlega.

Eins og fram hefur komið eru nú á byrjunarstigi viðræður um 500 milljóna dala lán frá Rússum, sem er um það bil einn tíundi af þeirra upphæð sem sendiherrann nefnir. Fyrirheit um það lán barst í nóvember sl., að sögn Jóns Sigurðssonar, og er það hugsað sem stuðningur við lán Íslands frá Alþjóðagjaldeyrissjóðnum.

Viðtalið við sendiherrann má sjá hér.